Ургут ҳокими мурожаатчини судга бермоқчи, Kun.uz'ни иғвогарликда айблаган депутат узр сўради

Туман ҳокими қабулига келган фуқароларга қўпол муносабатда бўлгани ва Мерганча маҳалласидаги хонадонларга қурилиш қилмаслик ҳақида огоҳлантириш берилгани ҳақидаги репортажлар шулар жумласидан.

Куни кеча бу мақолалар халқ депутатлари Ургут туман кенгашида танқидий муҳокама этилгани ҳақида хабар келиб тушди.

Кенгашнинг навбатдаги сессиясида ҳоким Ботир Жабборов ЎзЛиДеПдан сайланган депутат Бахтиёр Бекбоевга сўз берган. Депутат Kun.uz'да эълон қилинган мақолани муҳокамага тортишга уринган. Сайт ва фуқароларни иғвогарликда айблаган. Б.Бекбоев депутатларга мурожаат қилар экан, уларни ҳокимият ва тадбиркорларни кимдир «четдан келиб тепиб кетишига қараб турмаслик»ка ундаган.

«Чеккадан келадиган Kun.uz бизнинг оғир-енгилимизни ҳеч қачон ҳал қилиб берадиган ташкилот эмас. Бу нарсани яхши билиб қўйишимиз керак», – деган Бекбоев.

{Yii::t(}

Ўтказиб юбориш 6s

Ўтказиб юбориш

Депутат сессияда масъул идораларни Ургут эркин иқтисодий зонасининг имижига салбий таъсир ўтказмоқчи бўлган юридик ва жисмоний шахсларга нисбатан таъсирчан чора кўришга чақирган.

Kun.uz мухбирлари сайтни иғвогарликда ҳамда дирекция имижига салбий таъсир ўтказаётганликда айблаган депутат билан учрашиш мақсадида Ургут туманида бўлди. Умуман, ҳолат бўйича Ургут эркин иқтисодий зона дирекциясининг ҳам муносабати билан қизиқдик.

Дарвоқе, Ўзбекистон либерал демократик партиясининг туман бўлими ҳам Ургут ЭИЗ дирекцияси биносида жойлашган экан.

Ургут ЭИЗ дирекцияси директори ўринбосари Ғаффор Мадаров сайтда эълон қилинган мақолага ҳеч қандай эътирози йўқлигини маълум қилди. У Мерганча маҳалласи аҳлига ҳокимлик берган огоҳлантириш хатлари бўйича Ургут ЭИЗ дирекцияси дахлдор эмаслиги, огоҳлантириш хати орқали туман ҳокимлиги нимани назарда тутгани тўғрисида ҳеч қандай маълумоти йўқлигини билдирди.

Ғалати. Ургут ЭИЗ дирекцияси сайтда эълон қилинган мақолага ҳеч қандай эътироз қилмаётган экан (аслида ҳам, мақолада мутлақо дирекциянинг фаолияти тилга олинмаган), депутат Бахтиёр Бекбоев нега Kun.uz'ни бирёқлама мақола ёзганликда айблаяпти?

Ўйлаймизки, журналист фақат мурожаатчиларнинг иддаолари билан чекланган тақдирда бирёқламалик бўларди. Ваҳоланки, айнан аҳоли ва ҳокимлик ўртасидаги муаммо бўйича икки томоннинг изоҳи эълон қилинган.

Депутат биз билан суҳбатда ҳам сессияда айтган гапларини такрорлади. «Сизларда эълон қилинган мақола дирекциянинг обрўйига, ишчанлик кайфиятига путур етказади», деб туриб олди.

Яна бир гап. Мақолада саноат зонанинг аҳоли яшаш ҳудудига жуда яқинлиги, бу жиҳатлари билан экология ва маҳаллий аҳолига зарар етказиши мумкинлиги айтиб ўтилган. Шунинг баробарида ЭИЗ дирекцияси тадбиркорлик фаолияти учун ўзи жой танламаслиги, бу бўйича туман ва вилоят мутасаддиларининг жўяли таклиф бериши лозимлиги ҳақида сўз борган.

Шу ўринда бир қатор саволлар пайдо бўлмоқда:

• Депутат ЎзЛиДеП вакили бўлгани учун дирекцияни ҳимоя қилмоқчи бўляптими?
• Тадбиркорларни ҳимоя қиляпти ҳам дейлик. Ҳатто дирекциянинг ўзига яққол кўриниб турган ҳақиқат – сайт холис ёндашганини нега у англамаяпти?
• Мерганча маҳалласидагиларга огоҳлантириш хати берган ҳамда ҳудудда тайинли лойиҳа ва мақсади бўлмаган туман ҳокимлигининг ёнини олмоқчими?
• Халқ вакили сифатида нега бу ерда фуқароларнинг ҳам манфаати ётганини ўйлаб кўрмаяпти?
• Дарҳақиқат, сессияда туман ҳокими Ботир Жабборов бу депутат сўзга чиққанда икки-уч марта раҳмат айтгани ва фикрини қўллаб-қувватлаганига гувоҳ бўлишимиз мумкин.

Ҳоким сўзининг охирида фикрлари ўзига маъқул бўлган Бахтиёр Бекбоевга атай сўз берганини таъкидлаган.

Масаланинг энг қизиғи, Kun.uz мухбирлари Ургутдан қайтаётганида юз берди. Депутат Бахтиёр Бекбоев ўзининг фикри қатъий эканини айтганидан чамаси бир соатлар ўтиб, мухбирга телефон орқали боғланди. Бу сафар у негадир ўзининг жиддий хато қилгани, сайтни иғвогар демоқчи бўлмаганини изоҳлашга уринди ва узр сўради.

Яна бир гап. Сессияда ҳоким Ботир Жабборов Kun.uz'да эълон қилинган мақолада ўзининг фуқароларга нисбатан қилган қўполлиги акс этган аудиони ёзиб олган ва сайтга тақдим қилган фуқарони судга беришини билдирган.

Эслатиб ўтамиз, ҳокимнинг пўписасидан сўнг табиий газ сўраб келган мурожаатчиларнинг уйига газ эмас, ички ишлар идорасининг терроризмга қарши кураш бўлими вакиллари йўқлаб боришганди...

Исомиддин Пўлатов, Kun.uz мухбири
Тасвирчи – Фахриддин Ҳотамов