ЖЧ-26 қуръаси ҳақида барча маълумотлар: Ўзбекистон ҳам бугун рақибларини билиб олади

5 декабр куни, Тошкент вақти билан соат 22:00 да ЖЧ-2026 учун қуръа ташлаш маросими бошланади. Маросим Вашингтонда бўлиб ўтади ва унинг якунларига кўра 12 та гуруҳ таркиби, жумладан, ўз тарихида илк бор мундиалга чиққан Ўзбекистоннинг ҳам гуруҳ босқичидаги рақиблари аниқ бўлади. 6 декабр куни тақвим – ўйинлар ўтказилиш жойи ва вақти ҳам эълон қилинади.

Бу сафарги жаҳон чемпионатида илк бор 48 жамоа иштирок этади. Гуруҳлардан олдингидек фақат 1 ва 2-ўрин эгалари эмас, учинчи ўрин эгалари орасидан нисбатан энг яхши кўрсаткичларга эга саккиз жамоа ҳам плей-оффга йўл олади, плей-офф босқичи олдингидек 1/8 финалдан эмас, 1/16 финалдан старт олади. Бутун турнир 39 кунга (11 июндан 19 июлгача) чўзилади.

Ҳали турнир иштирокчилари рўйхати тўлиқ шаклланмаган, ЖЧ-2026 йўлланмасини фақат 42 жамоа ҳал қилган. Яна олти жамоа номи 2026 йил мартидаги ўтиш ўйинлари орқали маълум бўлади.

Барча жамоалар тўрт саватчага ажратилган. Турнир мезбонлари бўлган уч миллий жамоа автоматик равишда биринчи саватчадан ўрин олган, қолган 39 жамоа эса ФИФАнинг ноябр ойи рейтингидаги ўринлар бўйича тақсимланган. Ўтиш ўйинлари орқали йўлланма оладиган олти жамоа тўртинчи саватчага тушади.

Европада ўтиш ўйинлари қуйидагича кечади: Италия – Шимолий Ирландия жуфтлиги ғолиби Уэлс – Босния ва Герцеговина жуфтлиги ғолибига қарши ўйнайди; Украина – Швеция жуфтлиги ғолиби Полша – Албания жуфтлиги ғолибига қарши ўйнайди; Словакия – Косово жуфтлиги ғолиби Туркия – Руминия жуфтлиги ғолибига қарши ўйнайди; ва ниҳоят, Дания – Шимолий Македония жуфтлиги ғолиби йўлланма учун ҳал қилувчи баҳсда Чехия – Ирландия жуфтлиги ғолиби билан тўқнашади.

Европадан ташқаридаги ўтиш ўйинлари эса қуйидагича ўтказилади: Янги Каледония – Ямайка жуфтлиги ғолиби Конго ДР билан, Боливия – Суринам жуфтлиги ғолиби Ироқ билан ўйнайди.

Шу тариқа, саватчалар таркиби қуйидагича кўриниш олади:

1-саватча: Канада, Мексика, АҚШ, Испания, Аргентина, Франция, Англия, Бразилия, Португалия, Нидерландия, Белгия, Германия.

2-саватча: Хорватия, Марокаш, Колумбия, Уругвай, Швейцария, Япония, Сенегал, Эрон, Жанубий Корея, Эквадор, Австрия, Австралия.

3-саватча: Норвегия, Панама, Миср, Жазоир, Шотландия, Парагвай, Тунис, Кот-д’Ивуар, Ўзбекистон, Қатар, Саудия Арабистони, ЖАР.

4-саватча: Иордания, Кабо-Верде, Гана, Кюрасао, Ҳаити, Янги Зеландия; Европа плей-оффи ҳамда қитъалараро ўтиш ўйинлари орқали чиқадиган жамоалар.

Қуръа 1-саватчадаги барча жамоаларни A гуруҳидан L гуруҳигача тақсимлаш орқали бошланади. Кейин навбати билан гуруҳларнинг 2,3 ва 4-жамоалари аниқланади.

Муҳим жиҳатлар

Қуръадан кейиноқ жамоалар ўйинлар ўтказилиш жойи ва вақтини билиб олади. Ҳозирча фақат мезбонлар қарши гуруҳларда бўлиши аниқ: 1-саватдаги Мексика, Канада ва АҚШ мос равишда A, B ва D гуруҳларига жойлаштирилади, 1-саватдаги қолган жамоалар ўз гуруҳида 1-ўринларга жойлаштирилади. Очилиш ўйини 11 июн куни «Ацтек» ўйингоҳида (87,5 минг томошабин сиғади) A гуруҳидаги Мексика ва гуруҳга 3-саватчадан тушадиган жамоа ўртасида ўтказилади.

Битта конфедерация вакиллари бир гуруҳдан жой олиши мумкин эмас, бунда фақат 16 йўлланма берилган УЕФА вакиллари мустасно: 12 гуруҳнинг барчасида камида биттадан, тўрттасида иккитадан Европа вакили бўлади. Яъни, биринчи саватчадаги Германия ва иккинчи саватчадаги Хорватия бир гуруҳдан жой олиши мумкин. Бошқа ҳолатларда эса алоҳида жамоалар олдиндан бошқа бошқа гуруҳларда бўлиши белгиланмайди: масалан, АҚШ ва Эрон битта гуруҳга тушишига чеклов йўқ.

Фаворитлар плей-оффда ҳаддан ташқари эрта учрашиб қолиши эҳтимолини камайтириш учун ФИФА рейтингида энг юқорида жойлашган тўрт жамоа – Испания, Аргентина, Франция ва Англия турли гуруҳларга тушади ҳамда яримфиналгача ўзаро учрашмаслиги таъминланади. Испания ва Аргентина эса финалгача ўзаро тўқнашмайди. Бунинг учун, ушбу жамоалар ўз гуруҳларида ғолиб чиқиши талаб этилади. Бу қоида катта эҳтимол билан, охирги жаҳон чемпионатида Франция ва Англия чоракфиналдаёқ тўқнашгани ортидан жорий этилган.