Покистондаги масжидда портлаш, Москвада яна бир генералга суиқасд ва «яхши» бошланган АҚШ–Эрон музокаралари – кун дайжести

Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.

АҚШ ва Эрон музокараларининг биринчи босқичи якунланди

Уммон пойтахти Масқатда АҚШ ва Эрон ўртасида ядровий дастур бўйича ўтказилган билвосита музокараларнинг биринчи раунди якунланди. Унинг якунлари бўйича Теҳрон енгил оптимизм билдирди. «Бошланиши яхши», - деди Эрон ташқи ишлар вазири Аббос Арақчи жума куни. «Ишончсизлик деворини енгиб ўтиш керак», - деб қўшимча қилди у.

Эрон ТИВ раҳбари Теҳрон ва Вашингтон музокаралари қачон давом этиши кутилaётганини аниқ айтмади. Арақчининг сўзларига кўра, энди ҳар икки мамлакат делегациялари маслаҳатлашувлар учун ўз пойтахтларига қайтиб кетади. Шу билан бирга, Axios нашри манбаси навбатдаги раунд яқин кунларда бўлиб ўтишини маълум қилди.

Уммон ташқи ишлар вазири Бадр ал-Бусаидий музокараларни «жуда жиддий» деб атади. Дипломатнинг ёзишича, ҳар икки мамлакат делегациялари билан алоҳида учрашувлар «ҳам эронликлар, ҳам америкаликларнинг нуқтаи назарини ойдинлаштириш, шунингдек, эҳтимолий илгарилаш соҳаларини белгилаш учун фойдали бўлди».

АҚШ президенти Доналд Трамп ҳам музокаралар яхши ўтганини билдирди.

«Биз Эронга доир жуда яхши музокаралар ўтказдик. Эрон кўринишидан келишувга эришишга жуда қизиқмоқда. Бу қандай битим бўлишини кўрамиз», - деди Трамп. Шунингдек, у кутилаётган келишувга эришишнинг тахминий муддати учун АҚШда «вақт етарли» эканини айтди.

Масқатдаги музокаралар Эрон ва АҚШ ўртасидаги таранг муносабатлар фонида ўтди. Теҳрон фикрича, баҳс-мунозара иштирокчилари фақат икки мавзуга — Эроннинг ядровий дастурига ва санкцияларни эҳтимолий юмшатишга эътибор қаратиши керак. Вашингтон эса бошқа масалаларни ҳам муҳокама қилиш зарурлигини таъкидлайди: Эроннинг ракета дастури ва минтақадаги иттифоқчиларига кўрсатаётган қўллаб-қувватлови.

Россияга қарши навбатдаги санкциялар

6 феврал куни Европа комиссияси Россияга қарши 20-санкциялар пакети бўйича ўз таклифини тақдим этди. Ушбу пакет Россиянинг Украинага қарши кенг кўламли босқинининг тўрт йиллиги муносабати билан тайёрланган. У Россия нефтининг барча экспорти учун денгиз хизматларига тўлиқ тақиқ жорий этилишини ўз ичига олади.

Еврокомиссия раҳбари Урсула фон дер Ляйен янги санкциялар пакети доирасида Европа Иттифоқи «соя флоти» деб аталувчи яна 43 та кемани рўйхатга киритмоқчи. Натижада уларнинг умумий сони 640 тага етади ва Россия учун танкерлар харид қилиш янада мураккаблаштирилади.

Шу билан бирга, суюлтирилган табиий газ ташувчи танкерлар ва муз ёрувчи кемалар учун техник хизмат кўрсатиш ҳамда бошқа хизматларга кенг қамровли тақиқлар жорий этилмоқда. Бу чоралар Россиянинг газ экспорти лойиҳалари салоҳиятини қўшимча равишда пасайтириши кутилмоқда.

Баёнотга кўра, санкцияларнинг иккинчи блоки доирасида Европа Иттифоқи Россия банк тизимига босимни кучайтирмоқда. Чекловлар яна 20 та минтақавий банкка, шунингдек, санкцияларни четлаб ўтиш учун фойдаланилаётган криптовалюта институтлари, компаниялар ва платформаларга нисбатан қўлланди.

Шунингдек, Европа Иттифоқи илк бор санкцияларни четлаб ўтишга қарши кураш воситасини ишга туширади.

Эслатиб ўтамиз, санкцияларни жорий этиш учун Европа Иттифоқига аъзо барча давлатларнинг консенсуси талаб этилади.

Покистондаги масжидда портлаш

Жума куни Покистон пойтахти Исломободдаги шиалар масжиди ёнида юз берган портлаш оқибатида камида 31 киши ҳалок бўлди. Полиция хабарига кўра, яна тахминан 170 киши тан жароҳати олган.

Фожиа ибодат вақтида юз берган. Расмийларга кўра, портлашни худкуш террорчи амалга оширган: эркак портловчи мосламани фаоллаштиришидан олдин масжид кириш қисмида тўхтатилган. Гувоҳларнинг айтишича, жиноятчи аввал хавфсизлик кучларига қарата ўқ узган, сўнг бино ичида портловчи моддалар билан тўлдирилган камарини портлатган.

Воқеа жойига тез ёрдам машиналари сафарбар этилган. Фавқулодда хизматлар кўплаб жабрланганларнинг аҳволи оғир эканини маълум қилди. Исломободдаги шифохоналардан бирида фавқулодда ҳолат эълон қилинган.

ИШИД ҳужум учун жавобгарликни ўз зиммасига олган.

Москвада яна бир генералга суиқасд уюштирилди

Номаълум шахс Россия мудофаа вазирлиги генерал-лейтенанти Владимир Алексеевнинг ҳаётига суиқасд уюштирди.

Алексеев Бош штаб Бош разведка бошқармаси бошлиғи, Украина ва АҚШ билан уч томонлама музокараларда Россия делегациясига раҳбарлик қилаётган адмирал Игор Костюковнинг биринчи ўринбосари ҳисобланади. 2017 йилда унга Россия Қаҳрамони унвони берилган.

Тергов қўмитасига кўра, номаълум шахс Волоколамское шосседаги уйда Алексеевга қарата бир неча бор ўқ узган ва воқеа жойидан яширинган.

«Жабрланувчи шаҳар шифохоналаридан бирига жойлаштирилган», - деди қўмита расмийси.

Алексеевнинг ҳолати ва жароҳатининг оғирлик даражаси ҳақида расман хабар берилмаяпти. Айрим маҳаллий пабликларнинг ёзишича, генералнинг ҳолати оғир деб баҳоланмоқда.

Ҳужум юзасидан қотилликка уриниш ва ўқотар қуролларнинг ноқонуний муомаласи бўйича жиноий иш қўзғатилган.

ОАВда Алексеев Украинадаги ҳарбий ҳаракатларда қатнашаётган россиялик «кўнгиллилар» тузилмаларининг асосий кураторларидан бири экани ёзилган. Хусусан, у «Вагнер»га муқобил тарзда тузилган «Редут» хусусий ҳарбий компанияси фаолиятига масъул бўлган.

Бу Россиянинг Украинага қарши уруши бошланганидан буён россиялик юқори мартабали ҳарбий мулозимларга қарши уюштирилган навбатдаги суиқасд бўлмоқда.

Трамп Ҳиндистонга бож тўловларини бекор қилди

АҚШ президенти Доналд Трамп Ҳиндистондан экспорт қилинадиган маҳсулотларга нисбатан жорий этилган 25 фоизлик божни бекор қилди. Бу бож Ню Деҳли Россиядан нефт сотиб олаётгани билан асосланган эди. AFP агентлиги ҳужжат матнидан келтирган иқтибосларга кўра, «Ҳиндистон Россия Федерациясидан нефтни тўғридан тўғри ёки билвосита импорт қилишни тўхтатиш мажбуриятини олди». Шу сабабдан Ҳиндистондан АҚШга экспорт қилинадиган товарларнинг бир қисмига нисбатан бож тўловларини ундириш тўхтатилади.

АҚШ президенти Ҳиндистонга нисбатан 25 фоизлик божни 2025 йил август ойида жорий этган эди. У қарорини Ню Деҳли Россия Украинага қарши кенг кўламли босқинини давом эттираётган бир пайтда РФдан нефт харид қилаётгани билан изоҳлаган. Трамп таъкидлашича, бундай нефт харидлари Россиянинг «ҳарбий машинаси»ни молиялаштирмоқда.

Шундан бери Оқ уй раҳбари бир неча бор Ҳиндистонни РФдан нефт харид қилишдан воз кечишга кўндирганини айтган. Аммо бу баёнотлар тасдиқланмаган.

Ҳиндистон ҳукумат органлари энергетика сиёсати ўзгаргани ҳақида баёнот бермаган, Россия ҳам бу ҳақда изоҳ бермади. Фақат шу маълум: Ҳиндистон савдо вазири Пиюш Гоял бир кун олдин парламентда чиқиш қилиб, ҳукумат «энергия манбаларини диверсификация қилиш»га асосланган стратегияни амалга ошираётганини айтди.