ҲАМАС Ғазодаги уруш тугаганини эълон қилди

Ҳаракат вакили Ғазодаги уруш узил-кесил якунлангани ҳақида АҚШ ва воситачилардан кафолат олинганини айтди.

Фото: Видеодан кадр

Ғазодаги ҲАМАС музокаралар гуруҳи раҳбари Халил ал-Хайя ўт очишни тўхтатиш тўғрисидаги битим кучга кирганини эълон қилди, деб хабар берди Reuters.

Ал-Хайянинг телемурожаат билан чиққан баёнотида айтилишича, ҲАМАС Ғазодаги уруш узил-кесил якунлангани ҳақида АҚШ ва воситачилардан кафолат олган.

«Биз бугун уруш тугагани ва доимий оташкесим бошланганини эълон қиламиз. Келишув икки йўналишда ҳам Рафаҳ чегара ўтиш жойини очишни назарда тутади. Келишув доирасида Исроил барча фаластинлик маҳбус аёллар ва болаларни озод қилади», деди ал-Хайя.

Қайд қилинишича, келишув доирасида Исроил қамоқхоналарида умрбод қамоқ жазосини ўтаётган 250 нафар фаластинлик, уруш бошланганидан бери қўлга олинган яна 1700 нафар ғазолик фаластинлик, шунингдек, қўлга олинган барча аёллар ва болалар озод қилинади.

Аввалроқ, АҚШ президенти Доналд Трамп ҳам Ғазода урушу тугагани ва энди Ғазо қайта қурилишини эълон қилган эди.

Тайёрлаган: Сардор Юсупов

#Исроил #Ғазо #ҲАМАС

2023 йил 7 октябр куни Ғазо бўлгасидаги Ҳамас кучлари Исроилга ёппасига ракета зарбалари бериб, чегарадаги аҳоли пунктларини эгаллай бошлади. Бунга жавобан Исроил қўшинлари Ғазо бўлгасига бостириб кирди. Бу сафарги эскалация аввал кузатилмаган даражада кўп қурбонларга олиб келди.