Конгрессдагилар Трампнинг умрбод президентлик ҳақидаги орзусини танқид қилишди

АҚШ Вакиллик палатаси аъзолари томонидан мамлакат президенти Дональд Трампнинг президентлик муддати учун чекловни бекор қилиш бўйича билдирган фикри кескин қарши олинди. Хусусан, демократ-конгрессмен Ро Ҳанна президентнинг Хитой раҳбари Си Жингпиндан илҳомланиб билдирган фикрларини танқид қилди.

«Бу ҳазилми ёки йўқ, бундан қатъи назар, Си Жингпин каби мамлакатни умрбод бошқариш фикри — АҚШ президенти айтиши мумкин бўлган энг антиамериканча фикрдир. Бу гапни эшитса, Жорж Вашингтон гўрида тик турган бўларди», — дея ёзган конгрессмен ўзининг Twitter саҳифасида.

Бундан аввалроқ CNN нашри, Хитой ҳукуматининг давлат раҳбари лавозимида икки муддатга қолиш чекловини бекор қилиш ташаббусини «ажойиб» деб атагани ҳақида хабар тарқатганди.