Трамп Мелонини Эрон бўйича позицияси учун кескин танқид қилди

Аввалроқ Италия ҳукумати раҳбари, илгари Трампга хайрихоҳ деб баҳоланган Жоржа Мелони, АҚШ президентининг Рим папаси Лев XIV ҳақидаги баёнотларини ҳам “қабул қилиб бўлмайдиган” деб атаган эди.

Мақолада қайд этилишича, Трамп Corriere della Sera билан суҳбатда шундай деган: “У (Мелони) шунчаки Италия бунга аралашишни истамайди, дейди. Ҳатто Италия нефтини ўша ердан олса ҳам, ҳатто Америка Италия учун жуда муҳим бўлса ҳам. У Италия бунга аралашиши керак, деб ҳисобламайди. Америка бу ишни унинг ўрнига қилиши керак, деб ўйлайди”.

11 апрель куни бутун дунёда тинчлик учун ўтказилган ибодат маросими чоғида понтифик уруш олиб бораётган давлатлар раҳбарларини тўхташга ва музокаралар столи атрофига ўтиришга чақирган, “қайта қуролланиш режалаштириладиган ва ҳалокатли ҳаракатлар ҳақида қарорлар қабул қилинадиган стол атрофига эмас”.

Шундан сўнг, 13 апрелга ўтар кечаси Дональд Трамп ўзининг Truth Social тармоғида шундай деб ёзди: “Менга Эрон учун ядровий қуролга эга бўлишни нормал деб ҳисоблайдиган Папа керак эмас. Менга Америка Венесуэлага ҳужум қилганини даҳшатли деб ҳисоблайдиган Папа керак эмас, ахир у мамлакат АҚШга улкан миқдорда гиёҳванд моддалар етказиб берган ва бундан ҳам ёмони, ўз қамоқхоналаридаги маҳбусларни, жумладан қотиллар, наркосавдогарлар ва жиноятчиларни мамлакатимизга юборган. Шунингдек, менга Америка Қўшма Штатлари президентини танқид қиладиган Папа ҳам керак эмас, чунки мен айнан шу ишларни бажариш учун сайланганман”.

Бундан ташқари, Трамп Рим папаси Лев XIVни “жиноятчилик масаласида ожиз” ва “ташқи сиёсатда даҳшатли” деб атади.

14 апрель куни Corriere della Seraга берган изоҳида Дональд Трамп Жоржа Мелони ҳақида яна кескин фикр билдирди: “Қабул қилиб бўлмайдиган одам — айнан ўзи, чунки унга Эронда ядровий қурол бор-йўқлиги барибир, агар шундай имконият бўлса, Эрон Италияни икки дақиқада портлатиб юборарди”.

Шу билан бирга, Трамп ўзи Мелони билан анча вақтдан бери гаплашмаганини ҳам тан олди, “чунки у бизга НАТО бўйича ёрдам беришни истамайди, ядровий қуролдан халос бўлишимизга ёрдам беришни истамайди”.

“У мен ўйлагандек эмас экан”, — деди Трамп афсус билан.

Аввалроқ у Италия бош вазирини “дўст”, “буюк лидер” ва “доим ёрдам беришга интиладиган инсон” деб атаган эди.

Айни интервьюда АҚШ президенти “Италия аввалгидек мамлакат бўлиб қолмайди” деган фикрни ҳам билдирди ва “иммиграция Италияни ҳам, бутун Европани ҳам емирмоқда”, деди.

“Европа ўзининг миграция ва энергетика сиёсати туфайли ич-ичидан ўзини ўзи вайрон қилмоқда”, — дея таъкидлади Трамп.