«Барселона» камбэк қилолмади

Чемпионлар лигаси. 1/4 финал

«Атлетико» – «Барселона» 1:2
Голлар: Ямал, 4 (0:1). Торрес, 24 (0:2). Лукман, 31 (1:2)
«Атлетико»: Муссо, Молина, Ле Норман, Лангле, Руджери, Симеоне (Гонсалес, 66), Лиоренте, Коке (Кордоза, 89), Лукман (Баэна, 66), Гризманн (Сёрлот, 76), Алварес
«Барселона»: Гарсия, Кунде, Гарсия, Мартин, Канселу (Араухо, 89), Гави (де Йонг, 81), Педри, Ямал, Олмо (Баржи, 89), Фермин (Рэшфорд, 68), Торрес (Левандовски, 68)
Огоҳлантириш: Гави, 69.
Четлатиш: Э. Гарсия, 79.
Биринчи учрашув: 2:0

«Барселона» Чемпионлар лигасини тарк этди. Ҳанс-Дитер Флик жамоаси «Атлетико»га қарши жавоб баҳсида биринчи ўйиндаги икки тўп фарқини йўққа чиқара олди, аммо тўлақонли камбэк рўй бермади. Мадридликлар керакли паллада ўз голини уришди ва бош соврин учун курашда қоладиган бўлди.

«Барса» илк дақиқалардан ремонтада учун ҳаракатни бошлади ва ўйиннинг 33-сониясидаёқ ҳисобни очиши мумкин эди. Ямал марказдан ажойиб юришни амалга оширди ва қулай позициядан зарба берди. Аммо Муссо Облакнинг ўрнини бежиз тортиб олмаганини яна бир бор намойиш этиб, қойилмақом сейв амалга оширди. Лекин тўрт дақиқа ўтиб Ламин барибир ўз мақсадига эришди. «Барса»нинг собиқ ҳимоячиси Клеман Лангле Ямалнинг прессингига дош беролмади ва тўпни рақибга олдириб қўйди. Торрес вингерни Муссо билан яккама-якка вазиятга чиқарди ва Ламин бу сафар тўпни дарвозабоннинг оёқлари орасидан ўтказди.

Ўз вақтида Европанинг энг ишончли ҳимоясига эга жамоаси сифатида таърифланган «матрасчилар» орқа чизиқда хатога йўл қўйишда давом этишди. Доимий равишда кимдир сусткашлик қилар, позицияни йўқотар ва рақиб учун бўшлиқлар қолдирарди. Муссо Олмо билан яккама-якка вазиятда яна бир бор қутқаришига тўғри келди, аммо 24-дақиқада меҳмонлар барибир иккинчи голни уришди. Олмо тўпни ҳимоячилар ортига очилган Торресга ташлаб берди, ўйинни жуда бўш ўтказган Лангле бу сафар ҳам пас йўлини тўса олмади ва форвард эпизодни осонлик билан ҳал қилди – 2:0.

Мезбонлар ўйиндаги илк голли вазиятни бўлим ўрталарига келиб яратишди. Лукман дарвозабон ҳудудига пас узатди, Гризманн зарба берди, аммо Мартин тўп йўлини тўсиб қолди.

Кейин эса «Атлетико» ҳимоясида навбатдаги хато юзага келди ва Муссо яна бир бор жамоасини қутқарди. Бу вазиятда у Ферминнинг юзига зарба бериб юборди ва ўйинда пауза юзага келди.

Бу эса мадридликлар фойдасига хизмат қилди. Ўйин давом эттирилганида ҳисоб қисқарди. Гризманн тезкор қарши ҳужум бошлади, Лиоренте ўнг қанотдан жарима майдонига узатма берди, Лукман Кундедан илдамроқ ҳаракат қилди – 2:1.

Бўлимнинг қолган қисми Олмо «Атлетико» жарима майдонида Лиоренте билан яккакурашдан кейин йиқилиши бўлди. Аммо ўйинни бошқарган Клеман Тюрпен футболчи ўз ташаббуси билан йиқилди деб ҳисоблади ва пеналти белгиламади.

Умуман, «Барса» биринчи бўлимда статистик кўрсаткичлар бўйича яққол устунликка эришди. Меҳмонларнинг еттита зарбасидан олтитаси дарвоза соҳасига тўғри борди (1,72 xG). Муссо бўлмаганида ўйин тақдири 45 дақиқаликдаёқ ҳал бўлиши мумкин эди.

Аммо каталонияликлар иккинчи бўлимни кутилган шиддат билан бошлашмади. Ўйин Симеонени қаноатлантирадиган темпда давом этди. «Атлетико» чуқур ҳимояланди, «Барселона» позицион ҳужумлар уюштиришга уринди. Каталонияликлар рақиб ҳимоясида бўшлиқларга эга бўлишмади, шунга қарамай, 55-дақиқада меҳмонларнинг навбатдаги комбинация Торрес яна бир бор дарвозани ишғол этиши билан якунланди. Ферран ҳаводаги тўпни тўхтатмасдан дарвоза тўрига йўллади.

Аммо каталонияликлар жамоаси футболчилари ва мухлисларининг қувончи узоққа чўзилмади. VAR катта саҳнага чиқиб, офсайд қайд этди.

Бундай футболда кўк-анорранглилардан кучга асосланган футбол намойиш этиш талаб қилинарди. Ўйиннинг бир соати ортда қолганида Флик Левандовски ва Рэшфордни майдонга ташлади. Улар майдонга тушиши билан ўйинда яна бир пауза юзага келди. Гави ҳавода тўп учун курашда тирсаги билан Руджерининг бошига зарба бериб юборди. Футболчининг қоши ёрилди ва унга майдоннинг ўзида тиббий ёрдам кўрсатилди.

Бу танаффус ҳам «Атлетико» фойдасига хизмат қилди. Ўйин давом эттирилганида мезбонлар яққол голли вазиятга эга бўлишди: Ле Норман бир неча метр масофадан зарба йўллади – дарвозабон Гарсия тўпни қайтариб қолди.

Кўп ўтмай «Барселона» ўн киши бўлиб қолди. Яна бир хато Флик жамоасига қимматга тушди. Захирадан ўйинга қўшилганига кўп бўлмаган Сёрлот дарвозабон билан яккама-якка вазиятга чиқиб бораётганида Гарсия Эрик томонидан тўхтатиб қолинди.

Аввалига ҳакам ҳолат учун сариқ карточка кўрсатганди, кейин эса вазиятни монитор қаршисига бориб кўриб чиқди ва буни сўнгги умид фоли деб топди ва карточканинг ранги ўзгарди.

Бир ҳафта олдинги сценарий такрорланди – «Барселона» яна қизил туфайли ўз мақсадига эриша олмади. Флик ҳимоячи Араухони ҳужум чизиғига тушириб, вазиятни ўнглашга ҳаракат қилди. Ўйиннинг сўнгги қисмида айнан шу икки футболчи биттадан вазиятга эга бўлишди, аммо зарбалар кутилганидек чиқмади. Танаффусдан кейин кўк-анорранглилар xG бўйича атиги 0,60 кўрсаткичи қайд этишди. Симеоне учинчи марта «Барса»ни Чемпионлар лигаси чоракфиналида қолдириб кетди.

«Ливерпул» – «ПСЖ» 0:2
Голлар: Дембеле (72, 90+1)
«Ливерпул»: Мамардашвили, Керкез, ван Дейк, Конате, Фримпонг (Гомес, 46 / Нгумоа, 67), Собослаи, Гравенберҳ, Виртц, Мак Аллистер (Жонс, 74), Экитике (Салоҳ, 31), Исак (Гакпо, 46)
ПСЖ: Сафонов, Мендеш (Эрнандес, 38), Пачо, Маркиниос, Ҳакими, Невеш, Витиня, Заир-Эмери (Бералдо, 82), Кварацхелия, Дембеле, Дуэ (Барколя, 52)
Огоҳлантиришлар: Мак Аллистер (45+1), Конате (85)
Биринчи ўйин: 0:2

Яна бир учрашувда «Ливерпул» ўз майдонида «ПСЖ»ни қабул қилиб, 0:2 ҳисобида мағлуб бўлди. 

Парижликлар сафидаги икки голга ҳам Дембеле муаллифлик қилди.