Сардор Умрзоқов Президент администрацияси раҳбари бўлди

Бош вазир ўринбосари – инвестициялар ва ташқи савдо вазири Сардор Умрзоқов Президент администрациясининг раҳбари бўлди. Бу ҳақда президент матбуот котиби Шерзод Асадов хабар қилди.

«Президент фармони билан Сардор Ўктамович Умрзоқов Ўзбекистон Республикаси Президенти администрацияси раҳбари лавозимига тайинланди ва шу муносабат билан бош вазирнинг инвестициялар ва ташқи иқтисодий масалалар бўйича ўринбосари – инвестициялар ва ташқи савдо вазири лавозимидан озод этилди», дейилади хабарда.

8 июл куни Президент администрацияси раҳбари лавозимида 2018 йилдан буён ишлаб келган Зайнилобиддин Низомиддинов саломатлигидаги муаммо сабаб сифатида келтирилган ҳолда ишдан кетказилганди. Низомиддинов Ўзбекистон Касаба уюшмалари федерацияси кенгаши раисининг биринчи ўринбосари этиб тайинланди.

Сардор Ўктамович Умрзоқов 1977 йил 23 ноябрда Тошкентда туғилган. Тошкент давлат иқтисодиёт университети (бакалавр) ва Рэдинг университетини (Буюк Британия, магистратура) тамомлаган. Фалсафа доктори (PhD) илмий даражасига эга.

2000-2003 йиллар давомида Ташқи иқтисодий фаолият Миллий банки тизимида (аввалига бош офисда, сўнг Самарқанддаги бўлинмада) ишлаган. 2003 йилнинг ноябрида Европа тикланиш ва тараққиёт банкида (Лондон шаҳри) фаолият бошлаган.

2007 йилда ватанга қайтган Умрзоқов Молия вазирлиги Ғазначилиги бошлиғи ўринбосари, биринчи ўринбосари, Тошкент шаҳар Ғазначилиги бошлиғи лавозимларида ишлаган.

2014-2017 йилларда “Ўзбекчармпойабзали” уюшмаси бошқаруви раисининг маслаҳатчиси, 2017-2018 йилларда раис ўринбосари бўлган. Уюшма қайта ташкил этилиб, “Ўзчармсаноат”га айлантирилгач, 2018-2019 йилларда унга раислик қилган.

2019 йил 28 январда инвестициялар ва ташқи савдо вазири этиб тайинланган, 2020 йил 10 мартда эса бош вазир ўринбосари даражасига кўтарилган.

• UPD. Умрзоқовнинг ўрнига бош вазир ўринбосари – инвестициялар ва ташқи савдо вазири этиб Жамшид Хўжаев тайинланмоқда.