Ҳиндистонда қитъалараро ракета синовдан ўтказилди

Ҳиндистонда Agni-V русумли жанговар ядровий каллакни элта оладиган қитъалараро ракета синовдан ўтказилди. Бу ҳақда Times of India нашри ёзмоқда. 

Ракета Бенгал кўрфазидаги Абдул Калам оролида барпо этилган полигондан учирилган. Ҳинд ҳарбийларининг уқдиришларича, ракета ета олиши мумкин бўлган энг узоқ масофага учирилган (аниқлик киритилмаган) ва жанговар сафга қўйиладиган намунада синаб кўрилган. 

Шу билан бирга, бу Agni-V ракетасининг тўртинчи маротаба синаб кўрилишидир. Уларнинг барчаси муваффақиятли якунланган. 

Agni-V ракетасининг аниқ техник хусусиятлари маълум эмас. Уч босқичли, қаттиқ ёқилғида парвоз қиладиган ракетанинг узунлиги 17,5 метр бўлиб, вазни 50 тоннага яқин. У 1,5 тонналик фойдали юкни элта олади. Учириш қурилмаси кўчма бўлиб, Tatra автомобили негизида барпо қилинган. 

Ҳиндистон ҳарбийларининг сўзларига кўра, Agni-V Хитойнинг шимолий туманларига ета олади. У 5500-5800 кмга ета олади, деб ҳисобланилади. Бироқ, хитойлик экспертлар, уни 8 минг кмга парвоз қила олишини тахмин қилишади.