Россия президенти Шимолий Кореяга қурол-аслаҳа етказилишини тақиқлади

Россия президенти Владимир Путин Шимолий Кореяга исталган, жумладан ўқотар қурол-аслаҳа етказиб беришни тақиқлади. Тегишли фармон 30 декабрда ҳуқуқий ахборот интернет-порталида чоп этилди.

Бундан ташқари, Шимолий Кореяга Пхеньяннинг ядровий ва ракета дастурлари, оммавий қирғин қуроллари яратиш дастурларида қўлланиши мумкин бўлган ҳамда "қуролли кучларнинг салоҳиятини ривожлантиришга кўмак берадиган" материаллар, қурилма ва технологиялар бериш тақиқланди.

Фармонда айтилишича, у БМТ Хавфсизлик кенгаши томонидан 2270-резолюция қабул қилиниши ҳамда Шимолий Корея томонидан ракета-ядровий синовларнинг ўтказилишига жавобан имзоланган.

2270-резолюция Пхеньян томонидан январда синов ўтказилгандан кейин 2 март куни қабул қилинган. Ҳужжатга кўра, Шимолий Кореяга барча турдаги қурол-аслаҳани етказиш, консультатив-техник ёрдам бериш ва ходимларни тайёрлаш тақиқланади.