Қирғизистон ҳукумати Boeing фалокатида ҳалок бўлганлар сонига аниқлик киритди

Қирғизистон пойтахти Бишкек яқинида Boeing юк самолётининг қулаши оқибатида ҳалок бўлганлар сони 38 кишига етди. Бу ҳақда «Интерфакс» хабар бермоқда.

Қирғизистон соғлиқни сақлаш вазирлиги томонидан берилган маълумотга кўра, 17 январь, сешанба куни 38-инсоннинг жасади топилди. У самолёт экипажи аъзоси бўлиши мумкин.

Аввалроқ, Бишкек яқинида фалокатга учраган Boeing экипажининг тўртинчи аъзоси жасади топилгани хабар қилинганди.Туркиянинг ACT Airlines хусусий авиакомпаниясига тегишли Boeing 747-400 самолёти Бишкекдаги “Манас” халқаро аэропортининг учиш-қўниш қисмидан 1,5 км узоқликда фалокатга учраган. Самолёт аэропорт яқинидаги қишлоқ устига тушди. Бунинг оқибатида 32та уй вайрон бўлди. Лайнер Гонконг-Бишкек-Истанбул рейси бўйича парвозни амалга ошираётган бўлган.