Аёллар ва турли ирқ вакиллари АҚШ президенти бўла олади, деб баёнот берган АҚШнинг истеъфога чиқишга ҳозирлик кўраётган раҳбари Барак Обама.
"Агар биз барча учун тенг имкониятларни қўллаб-қувватлашда давом этсак, бизда аёл президент, лотинамерикалик президент, яҳудий президент, ҳинду президент, ва яна ким билади, қандай президентлар бўлиши мумкин", — деган Обама ўзининг Оқ уйдаги сўнгги матбуот анжуманида.
Обама аёлларнинг Америка тарихига қўшган ҳиссаси борасида фикр билдирар экан, 2016 йили Бразилияда бўлиб ўтган Олимпия ўйинларини мисол келтирди.
"У ерда қўлга киритилган медалларнинг ярмидан кўпини аёллар бизга тортиқ қилди. Бунга, бир неча йиллар муқаддам, аёлларимизга спорт билан шуғулланишлари учун имкон берадиган қонунчиликни қабул қилишимиз асос бўлди", — деган Обама.
Шу билан бирга, Обама "ирққа ажратиш ва ирқий стереотипларга" ажратиш билан боғлиқ бўлган эскича қарашлар ҳам мавжудлигини қайд этган.
Шунга қарамай, АҚШнинг бўлғуси собиқ президенти, ҳозирда, ирқий муносабатлардаги вазият бирмунча яхшиланганини таъкидлаган. Обама "келажак авлоднинг ҳозирги ёки ўтган аждодларга қараганда, бу борада ишончи кўпроқ бўлиши"га умид билдирган.
