Hilcorp Alaska нефть-газ компанияси Аляска қирғоқларидаги Кука кўрфазида нефть тўкилиши ҳақида хабар берди. Бу эса оқ китнинг ноёб турига салбий таъсир кўрсатади. Америка Биологик хилма-хиллик маркази (Center for Biological Diversity)нинг матбуот релизида шу ҳақида маълум қилинди.
Манбада таъкидланишича, у ерда Кука кўрфазидаги оқ китларга таҳдид солувчи нефть плёнкалари ҳосил бўлган. Бугунги кунда оқ китларнинг бу ноёб тури бор-йўғи 340 тани ташкил қилади.
Нефть тўкилиши сабаблари ҳозирча номаълум. Манбага кўра, у компаниянинг декабрь ойида рўй берган газ муаммосига боғлиқ эмас.
"Мен нефть тўкилиши ҳақидаги хабарни дастлаб 1-апрель ҳазили дея қабул қилдим, чунки Hilcorp кетма-кет яна бир камчиликка йўл қўйиши мумкин эмасдек туюлганди", - деди марказнинг океан дастурлари бўйича директори Миеко Сакашита.
Унинг сўзларига кўра, "океанда нефть майдонини яратишнинг хавфсиз усули бўлмайди".