Венгрия Киевга инкассатор машиналарини пулларсиз қайтаради

Венгрия ҳокимияти Украина давлат банки “Ощадбанк”ка ушлаб қолинган икки инкассатор автомобилини қайтаради, аммо улар ичида бўлган пул ва олтин Киевга топширилмайди. Бу ҳақда 12 март, пайшанба куни Украинанинг “Европейская правда” нашри вазиятдан хабардор икки манбага таяниб хабар қилди.

Режага кўра, автомобиллар шу куниёқ топширилади. Бу ҳақда украин томони адвокатларига тергов олиб бораётган Венгрия Миллий солиқ ва божхона хизмати терговчилари маълум қилган. “Европейская правда”нинг ёзишича, пул ва олтин шу ҳафта қабул қилинган қонунга мувофиқ Венгрияда қолади. Ушланган автомобилларнинг ҳолати ҳақида ҳеч қандай маълумот йўқ.

Ичида 40 миллион доллар, 35 миллион евро ва тўққиз килограмм олтин бўлган “Ощадбанк”нинг икки автомобили 5 март куни Венгрияда ушланган эди. Венгрия ҳокимияти пул ювиш гумони билан жиноий иш қўзғатган. Уларнинг маълумотига кўра, пул ва қимматбаҳо металлни ташишга гўёки Украина Хавфсизлик хизмати (УХХ)нинг собиқ генерали ҳамда ҳарбий тажрибасига эга яна бир неча шахс раҳбарлик қилган.

“Ощадбанк”да эса украин инкассаторлари маблағлар ва қимматликларни Австриянинг “Райффайзенбанк”и билан тузилган халқаро келишув “доирасида ва уни бажариш мақсадида” ташиганини билдирган. Киев инкассаторларни озод қилиш ва мол-мулкни қайтаришга чақирган.

Кейинги куни ушлаб турилган етти нафар инкассатор ватанга қайтган. Шундан сўнг Украина яна Венгриядан пул ва олтин қуймаларини қайтаришни талаб қилди. Ташқи ишлар вазири Андрей Сибиха юз берган воқеани “давлат бандитизми ва рэкетнинг мисли кўрилмаган акти” деб атади ва Украинанинг европалик шерикларини бу бўйича муносабат билдиришга чақирди. “Бу пуллар Венгрияга ёки унинг ҳукуматига тегишли эмас, улар Украина давлат банки ‘Ощадбанк’ка, демакки, украин солиқ тўловчиларига тегишли”, — деди Сибиха.

Венгрия 20 февралдан буён Европа Иттифоқининг Украинага пул ёрдамини блоклаб турибди. Гап 90 миллиард евро миқдоридаги кредит ҳақида кетмоқда, шундан 60 миллиард евро бевосита мамлакатни Россия Федерациясининг ҳарбий тажовузидан мудофаа қилиш учун мўлжалланган.

Венгрия ўз ветосини Украина ҳудуди орқали ўтувчи “Дружба” нефт қувурига Россия зарба берганидан кейин энди Россия нефтини ололмаётгани билан изоҳламоқда, чунки Киев гўёки таъмирлаш ишларини амалга оширмаяпти. Украина президенти Володимир Зеленский Будапешт танқидига жавобан Россия нефтининг Европа бозорида ўрни йўқлигини айтди.

Петер Сийяртонинг сўзларига кўра, Будапешт “Россия нефтининг ‘Дружба’ қувури орқали Венгрияга транзити тикланмагунча” ўз позициясини ўзгартирмайди.