Кибермаконда грециялик ва туркиялик хакерлар ўртасида уруш бошланди. Бу ҳолат Греция бош вазири сайтига киберҳужум амалга оширилганидан сўнг юз бермоқда, деб хабар қилди Грециянинг Star телеканали.
Жума куни Греция бош вазирининг сайти бир неча соат давомида ишламади. Туркиялик хакерлар гуруҳининг маълум қилишича, улар сайтни Грецияда Истанбулдаги Аясофия ибодатхонасида Қуръони Карим ўқилгандан сўнг норозилик юз бергач, бузиб киришган. "Аясофия бизники!", - дея маълум қилишди улар. Бош вазир матбуот хизмати сайтда муаммолар юзага келганини тан олди, бироқ хакерлар ҳақида ҳеч нарса демади, дея таъкидлайди телеканал.
Туркиялик хакерлар ҳужумидан бир неча соат ўтиб Anonymous’нинг Греция гуруҳи Facebook’даги саҳифасида баёнот билан чиқди, улар рўй берган ҳолатга жавоб беришларини айтишган.
"Сизлар бизнинг битта саҳифамизни буздингиз, биз эса сизларнинг юзлаб сайтларингизни яксон қиламиз", - дея маълум қилишган Anonymous Greece. Улар Туркиянинг www.yirmidort.tv телеканали сайтини бузиб киришиб, бу фақат бошланиши эканини қайд этишди.
"Бу бошланиши холос. Туркияга хуш келибсиз! Аясофия грекларга тегишли. Сизлар ҳеч нарса қила олмайсизлар. Греклар сизлардан кучлироқ", - дея ёзишган грециялик хакерлар. Шундан сўнг улар турк сайтларига оммавий киберҳужумлар ҳақида маълум қилишди, деб хабар беради телеканал.
