Хитой киберҳужум ҳолатларига доир Миллий маълумотлар хазинасини яратади

ХХР саноат ва ахборотлаштириш вазирлиги интернетдаги киберҳужум ҳолатларига доир Миллий маълумотлар хазинасини яратиш режасини тайёрлади. Идоранинг чоршанба куни эълон қилинган баёнотига кўра, телекоммуникацион ва интернет-компаниялар, шунингдек интернет-хизматлар вакиллари хазинага шу йўналишдаги хабарларни йўллашлари шарт. 

"Компаниялар, телекоммуникацион операторлар ва ҳукумат идоралари бундай ҳолатлар бўйича ахборот тақдим этишлари лозим, вируслар, ускуналардаги камчиликлар ва шубҳали IP-манзиллар ҳам шулар жумласидандир", - дейилади ҳужжатда. 

Янги ҳужжат 2018 йилнинг 1 январида кучга кириши кутилмоқда. "Қоидаларни бузадиган компания ва идоралар жарима ва маъмурий жазога тортилади", - дейилади баёнотда.

Хитойлик экспертлар сўнгги вақтларда хитой интернет сегментига киберҳужумларнинг кўпайганини таъкидлашмоқда. Хитой миллий интернет-хавфсизлик маркази (CNCERT) баҳоларига кўра, 2016 йилда хитой интернет сегментидаги мобил қурилмаларга ҳужум қилишга доир аниқланган янги зиён етказувчи дастурлар сони тахминан 2 миллионни ташкил қилди. 

Хитой антивирус дастурий таъминоти етакчиларидан бири ҳисобланган Qihoo 360 компанияси 2016 йилда хитой интернет сегментида 62,73 миллиард хакерлик ҳужумини аниқлаган.