Элчи Владимирдаги фожиа қурбонларининг аниқ сонини келтирди

6 октябрь куни Россиянинг Владимир вилоятида автобус ва поезд тўқнашуви юз бериши оқибатида ҳалок бўлган ўзбекистонликлар сони ҳақида охирги маълумотлар берилди.

Ўзбекистон Республикаси Фавқулодда вазиятлар вазирлиги маълумотига кўра, ушбу йўл-транспорт ҳодисаси оқибатида 16 киши ҳалок бўлган, шундан 15 нафари Ўзбекистон фуқаролари эди.

Ўзбекистоннинг Россиядаги элчиси Баҳром Ашрафхонов ҳам фожиада қурбон бўлган Ўзбекистон фуқаролари сони 15 нафарлигини тасдиқлади.

Унинг маълумот беришича, яна 5 нафар ўзбекистонлик турли даражадаги жароҳатлар билан шифохонага ётқизилган. Уларнинг иккиси ёш болалар, бири 1,5 ёшда, иккинчиси 3 ёшда. Шифокорлар уларнинг ҳаётини сақлаб қолиш учун кураш олиб бормоқда.

Қозоғистон ҳудудидан Россияга йўл олган автобусда жами 58 киши бўлган, шундан 56 нафари ўзбекистонлик бўлган.

Владимирдаги фожиадан омон қолган ўзбекистонликлар рўйхати эълон қилинди

Бундан аввалроқ Ўзбекистон Ташқи ишлар вазирлиги Ўзбекистон Республикасининг Москва шаҳридаги Элчихонасига асосланган ҳолда Владимирдаги фожиа оқибатида ҳалок бўлган ўзбекистонликлар сони 19 нафар бўлгани ҳақида хабар берганди.