Австрияда парламент сайлови натижаси эълон қилинди

Австрия социал-демократик партияси мамлакат парламенти учун навбатдани ташқари сайлов натижасига кўра, ўнг миллатчи Озодлик партиясидан ўзиб кетди. Овоз бериш бюллетенлари санаб бўлинганидан сўнг, мазкур партия 26,9 фоиз сайловчининг ишончини қозонгани маълум бўлди. Бу ҳақда РИА Новости хабар қилмоқда. 

Маълумки, 15 октябрда Австрияда навбатдан ташқари парламент сайлови ташкил этилганди. 

Сўнгги натижаларга кўра, аввалги сайловда иккинчи ўринни олган ўнг партия 26 фоиз сайловчилар овозини тўплай олган. Австрия халқ партияси эса, 31,5 фоиз билан энг кўп овоз олган партия бўлиб қолмоқда. Парламентдан, шунингдек, NEOS ва "Петер Пильц рўйхати" партиялари ҳам 5,3 ҳамда 4,4 фоизлик овоз билан ўрин олган. 

Шу билан етакчи консерваторлар парламентда 62 мандатга эга бўлади, социал-демократлар — 52, ўнглар — 51, "Янги Австрия" 10, "Пильц рўйхати" — 8 депутатлик курсисини эгаллайди.

Миллий кенгаш таркибига жами 183 депутат киради. Мамлакат президенти Александр Ван дер Беллен 20 октябрь куни Халқ партияси раиси Себастьян Курцга янги ҳукуматни шакллантириш ҳуқуқини беришини билдирди.