Ҳиндистон Хитой билан чегарада назоратни кучайтиради 

Ҳиндистон ҳукумати Хитой билан чегарада қўшимча 50 та пост қуриб, уларнинг сонини 176дан 226га қадар кўпайтирмоқчи. Бу ҳақда мамлакат ички ишлар вазири Ражнатх Сингх (Ҳиндистонда чегарачилар ИИВ тизимига киради – таҳ.) Ҳиндистон-Хитой чегарасидан қайтиб келган ҳарбий хизматчилар олдида сўзлаган нутқида маълум қилди.

"Биз ўзимизнинг тезкор имкониятларимиз ҳамда моддий-техник базамизни кучайтиришга ҳаракат қилмоқдамиз. Яқинда ҳукуматнинг 50та янги чегара постини қуриш бўйича таклифини олдик, ҳамда биз бунинг устида ишламоқдамиз", - дея Сингхнинг сўзларини келтиради Times of India газетаси.

Нашр маълумотларига кўра, Хитой билан чегарада (унинг масофаси 3488 км.ни ташкил этади) қўшимча тўртта батальон – 4 мингдан ортиқ ҳарбий хизматчилар жойлаштирилади. Бу қарор ҳар бир пост назорат қилувчи чегара участкалари ўртасидаги масофасини қисқартириш, ҳамда ҳаракатлар мувофиқлигини яхшилашга қаратилган.