ОАВ: Туркия суди Amnesty International’нинг 8 фаолини озод этди

Истанбул суди суд жараёни тугагунча ташқарига чиқмаслик шарти билан Amnesty International ҳуқуқни ҳимоя қилиш ташкилотининг 8 нафар фаолини озод этишга қарор қилди. Бу ҳақда Sabah нашри хабар бермоқда.

Ҳуқуқ ҳимоячилари террорчилик ташкилотига аъзоликда айбланмоқдалар. Ҳаммаси бўлиб 11 нафар фаолга айблов билдирилган, улардан 8 нафари ҳибсда ушлаб турилган. Туркия прокуратураси уларга 5 йилдан 15 йилгача қамоқ жазоси берилишини талаб қилмоқда.

Фаоллар, улар орасида Amnesty International’нинг Туркиядаги директори Идил Эсер ҳам бор, 6 июлда Истанбул яқинидаги Бююкада оролидаги меҳмонхонада ҳуқуқни ҳимоя қилиш анжумани вақтида ушланганлар. Amnesty International уларни озод қилишни талаб қилган, бироқ Туркия президенти Ражаб Тоййиб Эрдўған ҳуқуқни ҳимоя қилиш ташкилотини Туркияда давлат тўнтарувини амалга оширишга тайёргарлик кўришда айблаган. Шундан кейин Эсер ва унинг 7 ҳамкасби, жумладан Германия фуқароси Петер Штойдтнер ҳибсга олинган.