Эйфель минорасида гольф ўйнаш имкони пайдо бўлди

Париж тимсоли бўлган Эйфель минорасига ташриф буюрувчиларда гольф ўйнаш имкони пайдо бўлди. BFM телеканалининг хабар беришича, мини-майдонча 57 метрлик баландликда жойлашган.

Такрорланмас лойиҳа Франция гольф федерацияси билан биргаликда, спортнинг бу туридаги энг муҳим воқеа – Европа ва АҚШ жамоалари ўртасида Райдер кубоги учун баҳсдан аввал амалга оширилди. Беллашувлар келаси йилнинг 25-30 сентябрь кунлари Париждаги Le Golf National мажмуасида бўлиб ўтади. 

Олтита чуқурчага эга митти спорт майдончасини Париждаги энг машҳур жойлар – Луврдаги шишали пирамида-кириш, Нотр-Дам ибодатхонаси, Эйфель минорасининг ўзи, Гарнье операси, Ғалаба аркаси ва Монмартрдаги машҳур Сакре-Кёр базиликаси макетлари безаб туради. Бу ерда гольфни 5-ноябргача ўйнаб кўриш мумкин.