Мичигандаги стадионни портлатиш орқали бузишга уриниш зое кетди (видео)

АҚШнинг Мичиган штати ҳукуматининг 80 минг томошабинга мўлжалланган “Сильвердоум” стадионини портлатиш орқали бузишга уриниши зое кетди. Иншоотга бир нечта заряд ўрнатилиб, улар масофадан туриб портлатилди. Бироқ зарядлардан бир қисмигина ишлаган. Шу сабабли иншоот тош қотганча жойида турган.

Стадионни бузиш билан шуғулланган Adamo Group компаниясида таъкидланишича, портлашлар стадионнинг асосий устунларини буза олмаган. Бунга эса баъзи зарядларнинг электр симларидаги муаммо туфайли портламай қолгани сабаб бўлган. Энди стадион бошқатдан яна портлатиб кўрилади ёки устунлари экскаваторларда бузилади.

Detroit Free Press нашрининг ёзишича, 1975 йилда барпо этилган стадионнинг бузилиши муносабати билан бу ҳодисани ўз кўзлари билан кўргани юзлаб одамлар эрталабдан воқеа жойига келишган. Шунингдек, стадионнинг бузилиши интернет орқали ҳам намойиш қилинган. 

Стадион Понтиак шаҳрида жойлашган бўлиб, “Детройт Лайонс” футбол жамоасининг уй майдони бўлган. Стадионда АҚШда ўтган 1994 йилги жаҳон чемпионатининг 4 ўйини ўтказилган.