Ҳиндистонда “сув париси” кўринишидаги чақалоқ дунёга келди 

Ҳиндистонлик аёл оёқлари чатишиб кетган – “сув париси” кўринишидаги фарзандни дунёга келтирди. Ушбу чақалоқнинг сурати Daily Mail нашри томондан намойиш қилинди.

Маълум қилинишича, 23 ёшли она ҳомиладорлик вақтида тегишли текширувлардан ўта олмаган. Чақалоқ сиреномелия ёки сув париси синдроми деб аталувчи ривожланишдаги нуқсонга эгалиги туғуруқхонадагина аниқланган. Гўдак дунёга келгандан кейин 4 соат ўтгач вафот этган. 

Аёл кўзи ёриган шифохонанинг болалар шифокори Судип Саханинг айтишича, чақалоқнинг ота-онаси ишчилар синфига мансуб бўлиб, пуллари йўқлиги сабабли аёл тиббий кўрикдан ўта олмаган. Саханинг таъкидлашича, чақалоқда бундай синдром юзага келишига онанинг ёмон овқатланиши ва унда нотўғри қон айланиши сабаб бўлиши мумкин.

Сув париси синдроми 100 минг чақалоқдан бирида учраши мумкин ҳамда буйраклар ва сийдик қопи яхши ривожланмагани сабабли одатда бир кундан кейин ўлимга олиб келади. Бироқ бундай касаллик билан бир неча йил яшаган болалар ҳам бўлган. Мисол учун, бундай нуқсон билан туғилган америкалик Шайло Пепин ишлайдиган буйрак, аммо ичагининг бир қисми ва жинсий аъзолари йўқ бўлган ҳолда 10 йил яшаган ва 2009 йилда вафот этган.