«Манчестер Юнайтед» ва «Манчестер Сити» футболчилари ўртасида ўйиндан кейин рўй берган жанжал «шаҳарликлар» жамоаси вакилларининг мезбонларнинг швециялик ҳужумчиси Златан Ибраҳимовични мазах қилиши оқибатида келиб чиққан. Бу ҳақда Marca нашри хабар тарқатди.
АПЛнинг 16-турида «Манчестер Сити» сафарда «Манчестер Юнайтед»ни 2:1 ҳисобида мағлуб этди.
Ўйиндан кейин трибуналар остидаги хонада футболчилар ва мураббийлар ўртасида жанжал келиб чиққани маълум бўлди. Унда «МЮ» клуби устози Жозе Моуриньо ҳам иштирок этган.
Инглиз матбуотининг ёзишича, португалиялик мутахассисга «Сити» футболчиларининг ғалабани шовқин-сурон билан нишонлагани ёқмаган ва у уларга танбеҳ берган. Шундан сўнг, Моуриньо ва «шаҳарликлар» дарвозабони Эдерсон тортишиб қолган ва жанжал катталашиб, унга бошқа футболчилар ва мураббийлар ҳам қўшилган.
Аммо Marca нашри воқеалар ривожининг бошқача талқинини келтирмоқда. Унга кўра, «Сити» мураббийлари «Юнайтед» ҳужумчиси Златан Ибраҳимовичга қарата гап отган. «Ибра, жуда кўп гапирасан, бироқ, кам ҳаракат қиласан» - дейишган улар. Шундан сўнг, можаро бошланиб кетган ва унга камида 20 киши аралашган.
