Туркияда денгизга қулашига бир бахя қолган самолёт эвакуацияси видеоси 

Интернетда Туркиянинг Трабзонида денгиз бўйида жойлашган аэропортнинг учиш-қўниш йўлагидан чиқиб кетиб, жарлик ёқасидаги лойга ботиб қолган йўловчи самолётидан йўловчиларнинг эвакуация қилиниши видеоси пайдо бўлди   

Видеодан кўринишича, ваҳимага тушган одамлар самолётни унинг дум қисмидаги фавқулодда чиқиш эшигидан тарк этаётганларини кўриш мумкин. Шунингдек, видеода ўт ўчирувчилар самолётга сув сепаётганларини кўриш мумкин. Видео муаллифининг таъкидлашича, авариядан кейин йўловчилар орасида саросима бошланган.

Воқеа 13 январда Pegasus Airlines авиакомпаниясининг Анқарадан келган Boeing 737-800 самолёти билан юз берган. Самолёт бортида 162 киши бўлган. Ҳеч ким жабрланмаган. Воқеага қарамасдан аэропорт одатдаги равишда ишлашда давом этган.