Роналду «Реал»дан кетиш билан таҳдид қилмоқда. Қаерга?

Мадридда вазият оғирлашди ва бу Криштианунинг трансфери билан якунланиши мумкин. Уни сотиб олишга эса Европада фақат икки клубнинг қурби етади.

Агирре сиздириб чиқарган маълумот
Икки ой муқаддам Испанияда El Chiringuito de Jugones нашри журналисти Эду Агирре телеэфирда Криштиану Роналду «Реал»ни 2018 йилнинг 30 июнида тарк этишни режалаштираётгани, чунки, у клуб раҳбариятидан керакли қўллаб-қувватловни ҳис этмаётгани ҳақида гапирди. Ушбу журналистни Испанияда Роналду билан дўстона муносабатларга эга шахс сифатида билишади. У «Реал» ва Роналду ҳаётига оид янгиликларни ёритиб бориш билан шуғулланади ва маълумотларни унинг ўзидан олади. Демак, бу диққатга арзирли баёнот эди.

Бу видеода Роналду журналистлар орасидаги Эду Агирре билан саломлашиб ўтганини кўриш мумкин.

Гап пулдами?
Агирре яна бир чиқишида, ноябрда гап пулда эмаслиги, Роналду ўзини ҳурмат қилишларини исташини айтди. Декабрь ойида, клублар ўртасидаги жаҳон чемпионатидаги ғолибликдан кейин бу мавзу яна кун тартибига чиқди. Marca нашри навбатдаги сонини шундай муқова билан чиқарди: «Роналду кўпроқ истамоқда». Гап футболчи ўз маоши Лионель Месси ва Неймарникидан камлигига чидай олмаётганди.

Криштианунинг Мадриддаги йиллик маоши миқдори 21 миллион евро (бонуслар ҳисобга олинмаганда), бу эса Неймарнинг Париж клубидаги маоши 36 миллион евро ва Мессининг янги шартномадаги маоши 50 миллион евро фонида жуда ғариб кўринади, албатта. Яқиндагина бешинчи «Олтин тўп»ини қўлга киритган ва табиатан перфекционист бўлган португалиялик футболчи Мессининг йиллик маошининг 40 фоизи, Неймарнинг йиллик маошининг 60 фоизи миқдорида маош олишга қандай рози бўлсин?

Қолаверса, Роналдуни ҳалига қадар Испания солиқ хизматлари безовта қилиб туришади ва ундан 14,7 миллион еврони тўлаб қўйишни талаб этишади. Португалиялик футболчининг оиласи кенгайгандан кенгайиб бормоқда - уларни боқиш керак! Тўртинчи фарзанди туғилганидан кейин, ноябрь ойида Роналду ўз шартномасининг молиявий томони кўриб чиқилишини истай бошлади. Агирре орқали маълумот сиздирган Роналду «Қироллик клуби»га босим ўтказишни бошлади. Ахир у ўзини «яхшиларнинг яхшиси» деб ҳисоблайди.

Перес сўзида турмаган

Яқиндагина Испания ва Португалиядаги бир неча манбалар Роналду «Реал» президенти Флорентино Пересдан қаттиқ хафалигини ёзиб чиқди. Унга кўра, клуб президенти 2016 йилнинг охирида шартнома узайтирилган вақтда берган ваъдаларини бажармаган. Футболчи ва президент ўртасидаги келишувга кўра, шартноманинг молиявий бандлари 2016/17 йилги мавсум якунларига кўра яхшилаб берилиши керак бўлган. Ўша мавсумда эса Роналду бошчилигида «Реал» Испания чемпиони ва Чемпионлар Лигаси ғолиби бўлганди.

Португалиялик футболчи адолат нуқтаи назаридан маоши миқдори оширилиши керак, деб ҳисоблайди. Аммо Перес «ваъдаларни унутган». Барча ишоралари беҳуда кета бошлагач, унинг «ғазаби қайнай бошлади». 

Бироз аввалроқ эса Перес футболчининг агенти Жорже Мендешга мижози учун янги клуб ахтаришни бошлаши мумкинлигини айтгани ҳақида хабар тарқалди. Мадрид манфаатларини ҳимоя қилувчи Marca нашри клуб бу ўринда пулни эмас, Кришни ўйлаётгани ҳақида ёза бошлади.

Барчаси оддий, Роналду кейинги ойда 33 ёшга тўлади. Тажрибали бизнесмен Перес эса уни олиб қолиш клубга молиявий зарар келтиришини англамоқда.

Роналдуни сотиб олишга ким қодир?
Ёши ўтаётганига қарамасдан, Transfermarkt.de  маълумотида унинг трансфер нархи 120 миллион евро деб кўрсатилган. Салоҳиятли харидор унинг трансфери учун кўпроқ тўлашига ҳам тўғри келади. Футболчининг трансфери ҳар қандай харажатни қоплаб бера олади (реклама шартномалари ҳисобига). Ўтган йилнинг ёзида Forbes португалиялик футболчининг барча жиҳатларни қўшиб ҳисоблагандаги нархи қанчалигини аниқлаганди - бу 400 миллион еврога яқин. Перес ҳам айни вақтда шунча сумма сўрамоқда.

Бунинг устига йилига 30-35 миллион евролик маошни қўшиш керак, Роналду бундан камига рози бўлмайди. У камида 3-4 йиллик шартнома истайди, шунингдек, кўтарма пуллари ва турли бонуслар... Умуман олганда, Роналдуни таркибга қўшиб олишни истаган клубнинг захирасида 600-700 миллион евро пули бўлиши талаб этилади. Бундай харажатни эса ҳозирда фақат икки клуб кўтара олиши мумкин.

1. «ПСЖ». Париж клуби варианти матбуотда энг кўп муҳокама қилинмоқда. Биринчидан, икки клуб президентлари дўст ҳисобланишади. Иккинчидан, Париждагилар Роналдунинг келишини анчадан буён кутишмоқда. Учинчидан, Мадриддагилар Неймарнинг келишини анчадан буён кутишмоқда. Бу ўринда идеал вариант - икки клуб ўз етакчиларини алмашиши бўлади. Шуниси аниқки, Париж клубининг қатарлик хўжайинлари Роналдуни қаноатлантирувчи маошни тўлай олишади.

2. «Манчестер Юнайтед». Футболчи бир неча марта собиқ клубига қайтиш истагини билдирган. Агар Жозе Моуриньо Манчестер жамоасида мураббийлик қилишни давом эттирса, Роналду бу клубга бажонидил қайтади. Ушбу икки шахс ўртасида қалин муносабатлар мавжуд. Уларнинг тандеми ўз вақтида Мадридда анча муваффақиятли ишлаган.

Энди нима бўлади?
Кўринишидан, Перес Роналдунинг маошини оширишга рози эмас. Футболчи эса «Реал»да қолиши учун шартлари бажарилишини талаб этади. Бу вазият ўзгариши ҳам мумкин, футболда ҳеч нарсани олдиндан айтиб бўлмайди. Аммо кўп эҳтимолки, ёзда, жаҳон чемпионатидан кейин Криштиану клубини ўзгартиради. У қандай танловни амалга оширишидан қатъи назар, «Реал» унинг ўрнини тезда тўлдириши мумкин. Мадрид тахтини ким эгаллашини аниқ айта олмаймиз, аммо у кўп вақт бўш турмайди.