Хитой қирғоқларидаги нефть доғи бир ҳафтада 3 баробарга катталашди

ХХР қирғоқларида Эрон танкери Шарқий-Хитой денгизида чўкиб кетганидан сўнг сув юзасида пайдо бўлган нефть доғи бир ҳафта ичида уч баробарга катталашди. Бу ҳақда Хитой Давлат океанология бошқармаси хабарида айтилади.

Эрон компаниясига тегишли бўлган ва Панама байроғи остида ҳаракатланган, 136 минг тонна газ конденсатини олиб кетаётган SANCHI танкери Хитой қирғоқлари яқинида CF CRYSTAL Ҳонгконг қуруқ юк ташувчи кемаси билан 6 январь куни кечқурун тўқнашиб кетганди. Бир ҳафта ўтиб, 14 январда, танкер бортдаги навбатдаги портлашдан кейин чўкиб кетди. Фалокатдан сўнг Шарқий-Хитой денгизида нефть доғлари пайдо бўлди, улар, экологларнинг тахминича, бу тумандаги денгиз экотизимига катта зиён етказиши мумкин.

Сунъий йўлдош орқали олинган суратларга кўра, ҳодиса юз берган тумандаги сув юзасида умумий майдони 332 квадрат километр бўлган учта нефть доғи қайд этилган, ўтган ҳафтада эса уларнинг майдони атиги 109 квадрат километрга тенг эди.