Чиноз йўлидаги фоторадарлар синов тариқасида ишламоқда

Тошкент вилояти ҳудудидан ўтган М39 “Олмаота-Бишкек-Тошкент-Термиз” автомобиль йўлининг 806-871 км.лари оралиғида махсус автоматлаштирилган фоторадарлар ўрнатилиб, 2018 йил 20 январь кунидан синов тариқасида фойдаланилмоқда. Бу ҳақда Тошкент вилояти ИИБ ЙҲХБ KUN.UZ’га маълум қилди.

Ушбу тизим йўл ҳаракати хавфсизлигини замонавий технологиялар ёрдамида таъминлаш, юқори ҳаракат жадаллиги шароитида йўл ҳаракатини назорат қилиш, иштирокчиларнинг йўл-транспорт ҳодисаларидан ҳимояланганлик даражасини ошириш, қоидабузарликларни автоматик тарзда аниқлаш, қайд этиш ҳамда профилактика қилиш ишлари самарадорлигини оширади.

Йўл ҳаракати қоидасини бузган ҳайдовчиларни аниқлашга мўлжалланган, мазкур махсус автоматлаштирилган фоторадарлар қисқа муддатда Тошкент вилоятининг барча шаҳар ва туманларида босқичма-босқич ўрнатилиши режалаштирилган. 

М39 “Олмаота-Бишкек-Тошкент-Термиз” автомобиль йўлига ўрнатилган фоторадарлар 2018 йилнинг февраль ойидан тўлиқ ишга туширилади. Маълум қилинишича, айни вақтда бу қурилмалар синов тариқасида ишлаётгани сабабли жарималар ёзилмаяпти.