Ирқчи сиёсатчи ирқчилигини рад этди

Жанубий Африка республикасининг «Иқтисодий эркинлик учун курашчилар» (EFF) сўл радикал партияси етакчиси Жулиус Малема ўзининг президентлик кампанияси бошлангани ҳақида баёнот берар экан, унга қўйилаётган мамлакатнинг оқ танли аҳолисига нисбатан ирқчилик ва уларни камситиш каби айбловларга ўз муносабатини билдирди. 

AFP агентлигининг хабарига кўра, Малема у ва унинг тарафдорлари ҳамда ҳамкасбларида мамлакатнинг оқ танли аҳолисига нисбатан ҳеч қандай адоват йўқ. Шу билан бирга Малеманинг таъкидлашича, у ва унинг тарафдорлари қора танли фуқаролар эҳтиёжлари борасида ҳам қайғуришади. 

«Биз оқ танли инсонларни ёмон кўрмаймиз, биз шунчаки қора танлиларни яхши кўрамиз», — деган Малема. 

Шу билан бирга, унинг таъкидлашича, уни оқ танлиларнинг фикри қизиқтирмайди. 

«DA («Демократик альянс») учун овоз берувчи барча оқ танлилар, ҳаммангиз жаҳаннамга тушаверинг, бизни бу нарса ташвишга солмайди. Биз оқ танлилар ҳиссиётлари билан ҳисоблашмаймиз», — деган радикал сиёсатчи.

Аввалроқ, ЖАР парламенти оқ танли фермерлардан товон пули бермасдан ерларини олиб қўйиш бўйича қонунни қабул қилган эди.