Қирғизистон президенти аппарати раҳбари лавозимидан кетди

Қирғизистон президенти Сооронбай Жээнбековнинг аппарати раҳбари Фарид Ниёзов эгаллаб турган лавозимини ўз хоҳишига кўра тарк этди. Бу ҳақда давлат раҳбари матбуот хизмати хабар бермоқда.

«Қирғизистон Республикаси президенти Сооронбай Жээнбеков Фарид Абилезимович Ниёзовни тақдим этилган аризасига мувофиқ, президент аппарати раҳбари лавозимидан озод этиш тўғрисидаги фармонни имзолади», - дейилади хабар матнида.

Эслатиб ўтамиз, аввалроқ Қирғизистонда милицияни полицияга ўзгартириш таклиф қилинаётгани хабар берилганди. Бу ҳақда Қирғизистон бош вазири Сапар Исоқов “Умумий хавфсизлик ва жиноятчиликнинг олдини олиш сиёсати” миллий анжуманида маълум қилди. Унинг айтишича, милиция ва полиция ўртасида фарқ катта.