Фото: Бразилиянинг собиқ президенти ҳибсга олингач тартибсизликлар бошланди

Бразилиянинг Куритиба шаҳрида мамлакатнинг собиқ президенти Лула да Сильва ўзини полицияга топширгач, тартибсизликлар бошланди. Globo телеканали хабарига кўра, бу тартибсизликлар вақтида 8 киши жароҳатланган.

Жароҳатланганлар орасида 3 нафар вояга етмаган бола ва бир полициячи бор. Бир бола ва икки ўсмир шифохонага ётқизилган.

Қайд этилишича, полиция ходимлари собиқ президент тарафдорларини тарқатиш учун резина ўқлар, шовқинли гранаталар қўллаган.

Лула да Силва таслим бўлгач, вертолётда Куритабадаги Федерал полицияга келтирилди. 

Январь охирида собиқ президент коррупциядаги айблов бўйича 12 йил 1 ойлик қамоқ жазосига маҳкум қилинганди. Силва унинг апелляцияси қайта кўриб чиқилмагунча озодликда қолиши мумкин эди. Аммо суд собиқ президентни қамоққа ҳукм қилди, аввалига Силва полицияга таслим бўлишни истамасдан, ўз тарафдорлари қўриқлаётган бинога яширинди, аммо бир кун ўтиб у таслим бўлишга қарор қилди.

Бразилия қонунчилигига кўра, у эндиликда сайловларда қатнаша олмайди. Ҳолбуки у шу вақтгача октябрь ойида бўлиб ўтадиган президентлик сайловидаги асосий фаворит саналаётганди. Биринчи турда уни сайловчиларнинг 33,4 фоизи қўллаб-қувватлашга тайёрлиги маълум бўлганди.

Лула да Силва Бразилияни 2003 йилда 2010 йилга қадар бошқарган.