КХДР ТИВ раҳбари Ашхободдан Москвага келди

КХДР ТИВ раҳбари Ли Ён Хо Россияга расмий ташриф билан келди, деб хабар қилмоқда РИА «Новости».

Хабар берилишича, вазир Москвага маҳаллий вақт билан соат тахминан 10.00да Ашхободдан Туркманистон авиайўналишлари рейси билан етиб келган. У бортида бўлган самолёт Москвадаги Домодедово аэропортига қўнди. Чиқаверишда уни журналистлар кутиб турган, бироқ у саволларга жавоб қайтармасликни маъқул кўрди.

Аввалроқ КХДР ТИВ раҳбари Москвага амалга оширадиган уч кунлик ташрифи давомида россиялик ҳамкасби Сергей Лавров билан учрашиши хабар берилганди. Учрашувда икки томонлама ҳамкорликнинг долзарб масалалари, жумладан сиёсий мулоқот ва савдо-иқтисодий кооперация муҳокама қилинади. Шунингдек, гап Корея ярим оролидаги вазият ва унга ечим топиш йўллари ҳақида боради.