«Янги императорлар» «Барселона»дан қандай қасос олишди?

Римдаги одатдаги Чемпионлар лигаси ўйини ҳақиқий жангга айланиб кетди ва бу жанг каталонияликлар сенсацион равишда турнирдан чиқариб юборилиши билан якунланди.

«Рома» - «Барселона» - 3:0 (1:0)
Голлар: Джеко, 6 (1:0). Де Росси, 58 – пенальти (2:0). Манолас, 82 (3:0).
«Рома»: Алиссон, Жуан Жезус, Фасио, Манолас, Флоренци, Де Росси, Наингголан (Эль-Шаъровий, 77), Стротман, Коларов, Джеко, Шик (Женгиз Ундер, 73).
«Барселона»: тер Штеген, Семеду (Дембеле, 85), Пике, Юмтити, Жорди Альба, Серхи Роберто, Ракитич, Бускетс (Пако Алькасер, 85), Иньеста (Андре Гомеш, 81), Месси, Луис Суарес.
Огоҳлантиришлар: Фасио, 38. Жуан Жезус, 44. Пике, 57. Месси, 63. Луис Суарес, 72.
Ҳакам: Тюрпен (Франция).
10 апрель. Рим. «Олимпико» стадиони
Биринчи ўйин - 1:4.

Париждан Римга қадар
Ўтган йили «Барселона» ўзининг бор кучини майдонга ташлаб, «ПСЖ»га қарши сафарда 0:4 ҳисобидаги мағлубиятдан кейин «Камп Ноу»да керакли натижага эриша олганди - 6:1. Аммо бу сафар ўз кучига ҳаддан ортиқ кўп ишониб юборган каталонияликлар 3та тўп устунлигини йўққа чиқариб, «Рома»га йирик ҳисобда мағлуб бўлди. Бу «Барселона» Чемпионлар лигаси ярим финали йўлида илк марта итальянларга мағлуб бўлиши эди. Месси, Иньеста ва кўк-анорранглиларнинг бошқа юлдузларига нима бўлди, уларнинг мавсумда требль қилиш орзулари қаерга йўқолди.

Жеконинг қутқарувчи голи
Барчаси оддий ва шу билан биргаликда мураккаб ҳам. Бир ҳафта муқаддам «Рома» сафарда яхши ўйнаб туриб, 1:4 ҳисобида ютқазганди. Бу ҳисоб майдондаги вазиятга мутлақо мос бўлмаганди: иккита автогол, Семедунинг Джекога фоли учун белгиланмаган пенальти - «Барса» биринчи ўйинда ҳам ёрқин ўйини билан ажралиб турмаганди, мотивация жиҳатидан ҳам. Бундай муаммолар жамоада Чемпионлар лигасининг нимчорак финалида «Челси»га қарши биринчи ўйинда ҳам кўзга ташланганди. Ўшанда фақат Кристиансеннинг хатоси «Барселона»га сафардан дуранг билан қайтиш имконини берганди. Жавоб ўйинида Мессининг кайфияти яхши бўлгани туфайли «кўклар» турнирдаги иштирокини тўхтатишга мажбур бўлишди. Аммо бу сафар, Римдаги ўйинда аргентиналик футболчи жанговар ҳолатда эмаслиги кўриниб турганди - бу римликлардан олинган тарсакининг асосий сабабларидан бири эди.

Кўриниб тургандики, «Рома»да «Камп Ноу»даги йирик мағлубиятдан кейин жавоб ўйини учун бирон мақсадли режа йўқ эди, фақат Джеконинг сафардаги ўйин охиридаги урган ягона голи митти умид юлдузидек милтиллаб турганди, фақат ҳакамнинг ўйин бошланиши ҳақидаги ҳуштаги янграши билан мезбон футболчилар жангчиларга, янаям аниқроғи гладиаторларга айланишди. Футболчилар рақибни кескин кутиб олар ва тўпни олиб қўйиб, олдинга ташланарди. 6-дақиқадаёқ урилган тезкор гол «Барселона» фалокатининг дебочаси бўлди.

Чуқур пасга чиқиб келган Жекони бу сафар Семеду тўхтата олмади, тўп тер Штегеннинг қўллари орасидан дарвоза тўрига йўналди - ярим финал чиптаси каталонияликлар қўлидан чиқиб кета бошлади.

Иньестанинг куни эмасди

«Барселона» ўйин бошидан бир киши кам бўлиб ўйнаётгандек ҳиссиёт уйғонарди. Иньеста - афсона, аммо афсоналарда ҳам ёмон кунлар бўлади: Шик ва Де Росси уни гугурт чўпидек осон ёқди, каталонияликлар майдон марказини тўлиқ бой беришди. Натижада, Эрнесто Вальверда Иньестани майдондан олиб, Гомешни туширди.

Бу унинг навбатдаги хатосига айланди. Қолаверса, Бускетс оптимал формани тиклаб улгурмаган, Месси ва Суарес «Рома» футболчиларидан иборат мовий денгизда йўқолишди. Мезбонларнинг ҳар бир ҳужуми таҳликали кечар, Джеко тўп учун курашларда иккинчи қаватда Пикени доғда қолдирарди. Вазиятлардан бирида Пике босниялик ҳужумчини йиқитди ҳакам 11 метрли нуқтани кўрсатди. Ўтган ўйин бошидаёқ автогол уриб, барча режаларни бузиб юборган жамоа сардори Де Росси масъулиятни ўз зиммасига олиб, нуқтага яқинлашди ва Римга ярим финал умидини туҳфа этиб, айбини ювди.

Ўтган ўйиннинг яна бир антиқаҳрамони Манолас эса 82-дақиқада учинчи голни уриб, қаҳрамонга айланди. Кўк-анорранглиларнинг умиди Римдаги «Олимпико» стадионига кўмилди.

Рим императорлари
«Барселона» синовга дош бера олмади. Манолас каталонияликлар дарвозасини боши билан ишғол этгач, стадион портлай бошлади. Худди, бир вақтлар Рим империяси даврида варварларнинг асирлари майдонга олиб келинганида оломон қандай ҳайқирган бўлса, «Рома» мухлислари «Барселона» футболчиларига шундай даҳшат сола бошлашди. Эусебио ди Франческонинг шогирдларидан бу кеча ўтиб бўлмасди. Биринчи ўйиндаги омадсизлар Де Росси ва Манолас бу оқшомдаги мўъжизанинг ижодкорларига айланишди. Бу стадиондаги яна бир ажойиб хотира тарихга муҳрланди, бу  гладиаторларни «Рим императори» - Франческо Тотти олқишлади.

Бутун ҳафта Роналдунинг Буффонга урган фантастик голидан кейин интернетда аргентиналик ва португалиялик футболчидан қайси бири кучлироқлиги борасида абадий баҳс янада кучайганди. Бу баҳс давом этаверади. Аммо Роналдунинг жамоасини муҳим паллаларда қутқариши фонида «Барселона» Месси билан Чемпионлар лигасидан яна эрта чиқиб кетиши кўп нарсага ойдинлик киритди. Энди Мадрид клуби бу мавсумда ҳам чемпионлик учун асосий даъвогарга айланиб қолди. Роналду бу совринни қаторасига учинчи мавсумда ҳам боши узра кўтаришга чоғланган.