Нидерландияда очилган “қўшиқ куйловчи йўл” бир ҳафта ўтгач ёпилди

Нидерландиянинг Йелсум қишлоғи аҳолиси апрель бошида очилган “қўшиқ куйловчи йўл”нинг ёпилишига эришди. Маҳаллий аҳолининг айтишича, йўлдан тарқалаётган шовқин улар руҳиятига салбий таъсир қилган. Улар бу шовқинни ҳақиқий “руҳий қийноқ” деб аташган.

Ҳукумат йўлни қуриш учун 80 минг евро маблағ сарфлаган. Йўлнинг ҳар бир полосасининг ўнг томонига ўрнатилган махсус мосламалар ҳайдовчини тезлик режимига амал қилиши кераклигидан огоҳлантириши керак бўлган. Агар автомобил бу йўлдан 60 км/соат тезлик билан ўтса, у қишлоқ жойлашган Фрисландия вилояти мадҳиясини “ижро эта” бошлаган.

Биринчи кунданоқ ҳаммаси чаппасига кетган. Йўлдан бир нечта автомобил ўтаётганда йўл чиқараётган овозлар ёқимсиз шовқинга айланган ва яқин орада яшовчи аҳолининг асабига тега бошлаган.

Йелсум яқинида ҳарбий-ҳаво кучлари аэродроми жойлашган бўлиб, аҳолининг айтишича, йўлдан тинимсиз тарқалаётган ёқимсиз шовқинни эшитишдан кўра ҳарбий самолётлар овозини эшитиш маъқулроққа айланиб қолган. 

“Менга бундан кўра самолётлар шовқинини эшитиш маъқулроқдир. Жуда бўлмаса, улар соат 17дан кейин учмайдилар”, деб айтган маҳаллий аҳоли вакилларидан бири.

Амалдорлар аҳоли билан учрашгач, “куйловчи” йўлни яна оддий йўлга айлантиришга қарор қилишган.