Сурияга учирилган ракеталар сонига аниқлик киритилди

АҚШ, Франция ва Буюк Британия шанба куни эрталаб Сурия ҳудудига қарата 105та ракета учирган. Бу ҳақда АҚШ ҚК штаб бошлиқлари Қўмитаси вакили генерал Кеннет Маккензи Пентагонда ташкил этилган махсус брифингда хабар берди.

"Зарбалар аниқ белгилаб олинган учта нишонларга берилди", - дея маълум қилди Маккензи. Унинг таъкидлашича, етказилган зарарни баҳолаш давом этмоқда. "Биз бу объектларга зарар етказдик, ҳеч қандай қаршиликка учрамадик", - дея айтиб ўтди у.

Сурия ҳаво ҳужумидан мудофаа тизимининг жавоби самарасиз бўлди ҳамда кўпроқ тинч аҳолига таҳдид уйғотди, дея маълум қилган Маккензи. "Биз нишонларни диққатлик билан танладик, бунда оддий аҳоли вакилларига таҳдид минимум бўлиши кераклигига асосий эътибор қаратилди. Биз етказилган зарарни баҳолаш ишларини якунламоқдамиз, бироқ дастлабки маълумотларга кўра, биз ҳарбий вазифаларни Сурия томонидан жиддий қаршиликсиз бажарганмиз", - деди Маккензи. Унинг айтишича, Сурия ҳаво ҳужумидан мудофаа тизимининг жавоб ҳаракатлари оддий аҳоли вакилларининг жабрланишига олиб келган бўлиши мумкин.

Эслатиб ўтамиз, аввалроқ АҚШ президенти Дональд Трамп Сурияга ракета зарбасини «ажойиб амалга оширилган» деб атаганди.