«Роскомнадзор» Google'нинг блокланишига изоҳ берди

«Роскомнадзор» Google'нинг қатор IP-манзиллари блокланишига доир хабарни тасдиқлади. Бу ҳақида идоранинг «ВКонтакте»даги саҳифасида маълум қилинди.

«Роскомнадзор»да бундай чоралар ҳақиқатда Telegram мессенжери блокланиши билан боғлиқ экани тан олинди.

«Бугунга келиб Google «Роскомнадзор»нинг талабларини қониқтирмади ва суд қарорини бузиб, Telegram Messenger Limited Liability Partnership'га Россия ҳудудида фаолият юритиш учун ўз IP-манзилларидан фойдаланиш имконини бермоқда», - дея изоҳ берилди идорада.

Идорада шунингдек Telegram'нинг Россияда фаолият юритишига имкон бераётган қатор IP-манзиллар реестрга киритилгани қўшимча қилинди. 

Бундан аввал россиялик фойдаланувчилар Google сайтига киришда муаммоларга дуч келаётгани ҳақида хабар берилган эди.