Ереванда охирги кунларда иккинчи марта “кастрюль-чўмич” акцияси бўлиб ўтди.
24 апрелда маҳаллий вақт билан роппа-роса соат 23:00да маҳаллий аҳоли норозилик сифатида ўз уйлари ойналаридан ташқарига чўзилиб, чўмичлар билан кастрюлларга ура бошлашган. Акция 15 дақиқа давом этган.
Биринчи марта бундай акция 22 апрелда катта кўламли норозилик митингидан кейин ўтганди.
24 апрелда мухолифат етакчиси Никол Пашинян мамлакатнинг янги етакчиси ҳукмрон партиядан эмас, балки оддий халқ орасидан бўлиши, парламентга муддатдан аввалги сайловлар тез орада ўтиши кераклигини, бу талаблар бажарилмагунча намойишчилар кўчада қолишларини айтган. Жумладан, у ўзи ҳам мамлакат раҳбари бўлишга тайёрлигини айтган.
Пашинян 25 апрель эрталаб Арманистон бош вазири вазифасини бажарувчи Карен Карапетян билан учрашиши керак эди. Бироқ у бошчилик қилувчи “Фуқаролик келишуви” партияси матбуот котиби музокаралар бекор қилингани ва қачон бўлиб ўтиши номаълумлигини маълум қилган.
