Хитой Тижорат вазирлиги расмий вакили Гао Фэннинг маълум қилишича, мамлакат ҳукумати АҚШнинг иқтисодий соҳадаги ҳаракатларини кузатиб бормоқда ва савдо можароси кескинлашадиган бўлса, тегишли жавоб чораларини тайёрлаб қўйди. Бу ҳақда РИА «Новости» хабар қилмоқда.
«Биз Америка томонининг тегишли баёнотини эшитдик. Мен шуни таъкидлаб ўтишни хоҳлардимки, Хитой исталган протекционистик ва бир томонлама ҳаракатларга қатъий қарши чиқади. Хитой АҚШ баёнотлари ҳамда хатти-ҳаракатларини кузатмоқда, биз Вашингтон томонидан эҳтимолий ҳаракатларга реакция билдириш учун тегишли чораларни тайёрлаб қўйдик», - деди Гао Фэн Қўшма Штатларнинг иқтисодий сиёсатига нисбатан жавоб чоралари тўғрисидаги саволга тўхталар экан.
Вакилнинг таъкидлашича, Хитой компаниялари узоқ вақт давомида АҚШ ҳудудидаги бизнесга сармоя йўналтирди ва мамлакат иқтисодиётига «жиддий ҳисса» қўшди.
Эслатиб ўтамиз, аввалроқ Хитой ТИВ расмий вакили Лу Кан КХДР етакчиси Ким Чен Иннинг ядровий синовларни тўхтатиш ҳақидаги қарори ярим орол ядросизланишига туртки бериши ҳақида маълум қилганди.
