АҚШ ва Хитой ўзаро савдо урушини тўхтатиш шартларини маълум қилишди  

Пекинда АҚШ ва Хитой ўртасида 2 кун давом этган савдо музокаралари бесамар тугади. Бироқ томонлар бажарилиши дунёнинг энг катта иқтисодиётлари ўртасидаги савдо урушининг олдини оладиган ўзаро талаблар билан алмашишди. Томонлар баъзи бандлар бўйича келиша олишган, баъзилари бўйича келишмовчиликлар сақланиб қолган. 

АҚШ делегация раҳбари, АҚШ молия вазири Стивен Мнучин музокараларни “ жуда яхши” дея баҳолаган.

АҚШ Хитойга “сўровлар рўйхатини” тақдим қилган. Унда Вашингтон Хитойдан 2020 йил охиригача 2018 йилга нисбатан савдо дефицитини камида 200 млрд долларга қисқартиришни сўраган. 2017 йилда АҚШнинг Хитой билан савдо дефицити 375,7 млрд долларни ташкил қилган ёки бу АҚШ умумий савдо дефицитининг 46 фоизини ташкил қилади.    

Вашингтон, шунингдек, Пекиндан “Хитойда ишлаб чиқарилган 2025” дастури доирасида баъзи субсидиялардан воз кечишни, интеллектуал мулкка ҳуқуқларни ҳимоялашни кучайтиришни, АҚШнинг чекловларига жавоб чоралари қўллашдан тийилишни сўраган. 

Хитой, ўз навбатида, АҚШ маҳсулотлари импортини ошириш ва улардан баъзилари, жумладан автомобилларга тарифларни камайтиришни таклиф қилган. Пекин Вашингтондан миллий хавфсизлик манфаати йўлида Хитой инвестицияларини таҳқирламасликни, янги сармояларни чеклашдан тўхташни, Хитойнинг 100 дан кўпроқ маҳсулотларига 25 фоизлик бождан воз кечишни, интеллектуал мулк ўғирланиши бўйича янги терговларни олиб бормасликни, АҚШнинг давлат харидлари бозорига Хитойнинг технологик маҳсулотлари ва хизматларига йўл очишни, Хитой компаниялари учун АҚШ электрон бозорини очишни сўраган.

Хитой шунингдек АҚШдан Хитойда телекоммуникация ускуналари ва мобил телефонлар ишлаб чиқарувчи 2-рақамли компания ZTE’нинг унга 7 йилга АҚШ маҳсулотлари ва технологиялари етказилишига киритилган тақиқлов бўйича аппеляциясини кўриб чиқишни ҳамда China International Capital инвестицион компаниясига молиявий фаолият юритишга лицензия беришни сўраган.

“АҚШнинг савдо дефицитини қисқартириш талаби асоссиздир ва Хитой ҳукумати томонидан бажарила олинмайди. Жуда бўлмаса томонлар музокараларни давом эттиришга қарор қилишгани таҳсинга сазовордир, бироқ савдо уруши бўлиши мумкинлигини истисно қилиб бўлмайди”, деб айтган Хитой ва глобаллашув маркази директори ўринбосари Хэ Вэйвэнь.