Британияда «энг қидирилувчи» киши Барселонада ҳибсга олинди

Барселона полицияси Британияда «энг қидирилувчи» инсон деб аталувчи 41 ёшли Жейми Акурни қўлга олди. Бу ҳақда «Би-би-си» хабар берган.

Амалиётга Буюк Британия Миллий криминал агентлиги, Лондон полицияси ва Испания Миллий полицияси ходимлари томонидан тайёргарлик кўрилди. Ҳуқуқни муҳофаза қилиш органларининг қуролланган ходимлари эркакни Барселонадаги тренажер зали ёнида жума, 4 май куни қўлга олишди, сўнг уни қамоққа жойлаштиришди.

Акур гиёҳванд моддаларни жуда катта кўламда етказиб беришни ташкил этишда гумонланмоқда. Эркакка нисбатан суриштирув ишлари 2016 йилда бошланди.

Айни дамда Акур Мадриддаги қамоқхонада келаси ҳафта ўтказиладиган суд мажлисини кутмоқда. Унда уни экстрадиция қилиш масаласи кўриб чиқилади.