Хитойда 118 болани асраб олган аёл ҳибсга олинди 

Хитойнинг Уань шаҳри маъмурияти бутун мамлакатга 118 нафар болани асраб олиш учун миллионлаб пуллар сарфлагани билан танилган аёл Ли Лицзюанни жиноятлар содир этиш гумони билан ҳибсга олди ва унга тегишли хусусий болалар уйини ёпишга қарор қилди.

Ўзини миллионер деб атаган аёл болаларни 1996 йилда асраб олишни бошлаган ва 2007 йилда ўзининг “Муҳаббат қишлоғи” деб номланган хусусий болалар уйини ташкил қилган. ОАВнинг маълум қилишича, аёл 118 болани асраб олган. Унинг бу фаолияти ОАВда фаол ёритилган ва шу сабабли аёл бутун мамлакатга танилиб кетган. 

Полициянинг маълум қилишича, аёл танилиб кетгач, хайр-саховатидан бойиш учун фойдалана бошлаган, бюджетдан ва саховатпешалардан катта пуллар ола бошлаган. Полициянинг таъкидлашича, аёл асраб олган болалардан маҳаллий амалдорларни қўрқитиш ва уларга таҳдид қилишда фойдаланганликда гумон қилинмоқда. 

Ҳукуматнинг хабар қилишича, асраб олинган болалардан баъзиларининг аслида ота-оналари бор бўлиб, болалар уйи уларнинг номларидан ҳукуматни алдаш ва улар учун давлат маблағларини олиш учун фойдаланган.

Ҳукумат болалар уйини ёпишга қарор қилгандан кейин у ердан 74 нафар болани ўзига олган.

Аёл эса бир қатор жиноятлар, жумладан шантаж ва жамоат тартибини бузишда гумон қилинмоқда. Полиция аёлнинг ҳисоб рақамидаги 20 млн юандан (3,1 млн доллар) ва 20 минг доллардан кўпроқ пулни музлатиб қўйди. Ҳукумат, шунингдек, аёл кўплаб кўчмас мулк объектларига ва ҳашаматли автомобилларга эга эканлигини аниқлаган.

Бундан ташқари, болалар уйида ўғирланган болалар сақлангани ҳақида маълумот пайдо бўлган. Шу муносабат билан полиция йўқолган болалар маълумотлар базаси билан солиштириш учун болалардан қон намунаси ва бармоқ излари олган.