Европа иттифоқи Қрим кўпригининг қурилишини қоралади

Европа иттифоқининг ташқи сиёсий хизмати Керч бўғози орқали кўприк қурилишини Украина суверенитети ва ҳудудий яхлитлигининг бузилиши деб атади.     

“Кўприк қурилиши ноқонуний қўшиб олинган Қрим яриморолининг Россия билан мажбурий бирлашиши ва унинг Украинадан яккаланишига қаратилган. Кўприк Керч бўғози орқали Украинанинг Азов денгизидаги портларига кемалар ўтишини чеклайди”, деб айтган ЕИнинг ташқи сиёсий хизмати вакили Майя Косьянчич.  

Унинг айтишича, “Европа иттифоқи Қрим ва Севастополнинг Россия томонидан ноқонуний қўшиб олинишини қоралайди ва бу халқаро ҳуқуқ бузилишини тан олмайди”.

15 май куни Россия президенти Владимир Путин кўприкнинг автомобиллар қисмини очди. У кўприкдан КамАЗни бошқарган ҳолда, ўз ортидан 30 та юк машинасидан иборат карвонни олиб ўтган. Йўл 16 дақиқани эгаллаган. 

Қрим ва Краснодар ўлкасини боғловчи кўприк Россиядаги энг узун кўприк ҳисобланади, унинг узунлиги 19 кмни ташкил қилади. 16 май куни кўприк автобуслар ва енгил автомобиллар учун очилади.