Баҳрайн АҚШнинг Эронга нисбатан талабларини қўллаб-қувватлади 

Баҳрайн ташқи ишлар вазирлиги АҚШнинг Эронга нисбатан янги стратегиясини тўлиқ қўллаб-қувватлашини айтди ва бундай позицияни билдирган илк араб давлати бўлди. 

АҚШ давлат котиби Майк Помпео ўз нутқида Вашингтон Теҳрон билан ядровий келишувдан бир томонлама чиққандан кейин Эронга нисбатан 12 та талабдан иборат рўйхатни баён қилди. У Теҳрондан ядровий келишувнинг барча асосий қоидаларига ва Эрон раҳбариятининг минтақада ва ўз давлатидаги сиёсатга тегишли бир қатор талабларга риоя қилишни талаб қилган.  

Баҳрайн ташқи ишлар вазирлиги баёнотида айтилишича, АҚШнинг Эронга нисбатан янги стратегияси Эроннинг минтақадаги хавфсизлик ва барқарорликка қарши қаратилган сиёсатига қарши туриш, Эрон билан ядровий келишув қабул қилиниши билан боғлиқ камчиликларни бартараф этиш ва Эроннинг баллистик ракеталарни ривожлантириш дастурини тақиқлаш бўйича талабларни акс эттирган.  

Баҳрайн Эрон тинчлик ўрнатиш ва ихтилофларни ҳал қилиш бўйича билдирилган барча талабларни бажариши кераклигини таъкидлаб ўтган.