Европа инвестиция банки (ЕИБ) делегацияси вице-президент Вазил Худак бошчилигида Ўзбекистонга келди. Республика ТИВ матбуот хизмати шу ҳақида хабар берди.
Ташриф дастуридан Ўзбекистон Республикаси Олий Мажлис Сенати, ҳукумат, қатор вазирлик ва идоралар раҳбарлари билан учрашув ҳамда музокаралар ўрин олган. Бу учрашувларда Ўзбекистон ва ЕИБ ўртасидаги ҳамкорлик истиқболларининг амалий мезонлари муҳокама қилинмоқда.
Делегация шунингдек "UzbekistanPeugeotCitroenAutomotive" қўшма тадбирига ташриф буюради.
Таъкидлаш жоизки, 2017 йилнинг 13 октябрида Европа инвестиция банки ва Ўзбекистон ўртасида ЕИБнинг Ўзбекистондаги фаолияти ҳуқуқий асосларини белгилаб берувчи доиравий келишув имзоланганди.
Ҳужжатга кўра, ЕИБ давлат инфратузилмаси, энергетика ва энергосамарадорлик, шунингдек кичик ва ўрта бизнесни ривожлантириш каби соҳаларда давлат ҳамда хусусий сектор лойиҳаларини қўллаб-қувватлашни амалга ошириши мумкин.
Ўзбекистон Республикаси Марказий Осиёнинг ЕИБ билан ҳамкорлик қилаётган тўртинчи мамлакати. Бундай келишувлар Қозоғистон, Қирғизистон ва Тожикистон билан ҳам имзоланган. Бу келишувлардан кейин 700 миллион евродан ортиқ молиялаштириш операциялари амалга ошиши кутилмоқда.
