Кўчада вафот этган ливанлик гадой аёл миллионер бўлиб чиқди

Ливан полицияси Байрут кўчасида юрак хуружидан вафот этган 52 ёшли Фотима Отманни аниқлади. Унинг ёнидан ҳисоб рақамида 1,7 млрд Ливан фунти (1,1 млн доллар) бўлган омонат дафтарчаси топилган. Бу ҳақда Al Arabiya нашри маълум қилди. 

Маҳаллий ОАВ маълумотларига кўра, аёл Ливандаги фуқаролик уруши вақтида жароҳат олган ва танаси қисман фалажланиб қолган. Маълум қилинишича, аёл 20 йил давомида гадойчилик билан шуғулланиб, ижарага олинган машина ичида яшаган. Машина текширилганда унинг ичидан 5 млн фунт (3 минг доллар) топилган.

Полиция аёлнинг жасадини яқинларига топширган. Аёлнинг яқинлари у тўплаган пул миқдоридан “ёқаларини тишлашган”.