Россия Донбассдаги вазият кескинлашишига нима сабаб бўлганини маълум қилди

Донбассдаги вазият АҚШнинг Украина бўйича махсус вакили Курт Волкер ташрифи туфайли янада кескинлашган. Бу ҳақда Россия ТИВ расмий вакили Мария Захарова маълум қилди, деб хабар бермоқда РИА «Новости».

Курт Волкер Украинага 14 май куни ташриф буюрди. Захарованинг сўзларига кўра, у қатор «ёқимсиз баёнотлар» берган, бунинг ўрнига эса Киевдан можарони кескинлаштиришни бас қилиш ҳақида талаб қилиши керак эди.

«Улар орасида америкалик вакилнинг Донбасс республикалари бор эканини тан олишдан бош тортиши ҳам бор. Бу ҳолат у Минск келишувларини ўқимагани ёки аниқ нарсани ҳам кўришни истамаётганидан далолат беради», - дея таъкидлаб ўтди Захарова.

Унинг қайд этишича, Волкер «оловга мой қуймоқда» ва ўзини можарода иштирок этаётган томонлардан бирининг вакили сифатида ҳис этмоқда. Шунингдек, Захарованинг кўрсатишича, АҚШ махсус вакили жўнаб кетгач, Украина қуролли кучлари ҳарбий ҳужумларни фаоллаштирган.

«Волкернинг Киев хатти-ҳаракатларини қўллаб-қувватлаши Украина ҳукумати томонидан ҳарбий қадамларга аниқ индульгенция сифатида қабул қилиняпти», - дея хулоса қилган ТИВ вакили.

Эслатиб ўтамиз, аввалроқ украиналик депутат Қрим кўпригини йўқ қилиб ташлаш кераклиги ҳақида маълум қилганди.