Ким Чен Ин Хитойга келди

Фото: kyodonews

Шимолий Корея етакчиси Ким Чен Ин Пекинга келди. Япониянинг Nihon Television Network телекомпанияси операторлари Кимнинг ҳукумат самолётидан тушаётганини тасвирга олишган.

Парвозларни мониторинг қилувчи Flightradar24 портали маълумотларига кўра, Ким Чен Ин Пекинга ўтган ҳафтада АҚШ президенти Дональд Трамп билан учрашувга Сингапурга борган самолётда келган.

Ким Чен Ин Хитой раиси Си Цзиньпин билан учрашиб, 12 июнда бўлиб ўтган АҚШ-КХДР саммити ва кейинги музокараларни олиб боришни муҳокама қилади. Ташриф 2 кун давом этади.

Ким Чен Ин Хитойга 25-28 март кунлари ҳам рафиқаси билан ташриф буюрганди. Бу Кимнинг 2011 йилда ҳокимиятга келгандан кейин илк хорижий сафари бўлган. Ким Чен Иннинг Хитойга иккинчи ташрифи 7-8 май кунлари бўлиб ўтган.