Саудия Арабистонида аёлларга нотариус сифатида ишлашга рухсат берилди

Саудия Арабистонида илк аёл-нотариуслар фаолият юрита бошлади. Бу ҳақда қироллик адлия вазирлигига иқтибос келтирган ҳолда “Ахбор24” янгиликлар портали маълум қилди.  

Маълумотларга кўра, адлия вазирлиги 9 июлда 12 аёлга нотариус бўлиб ишлаш учун лицензия берган. Таъкидланишича, қиролликда бундай лицензияга 1,3 минг киши эга.

Саудия Арабистони қироли Салмон томонидан унинг ўғли Муҳаммад бин Салмон валиаҳд шаҳзода этиб тайинлангандан кейин дунёдаги энг консерватив давлатда аёлларнинг ҳуқуқлари ва эркинликлари билан боғлиқ ислоҳотлар бошланди. Ушбу ислоҳотларга кўра, қироллик аёллари тарихда биринчи марта автомобил ҳайдаш, оммавий спорт тадбирларига ташриф буюриш, армия ва полицияда хизмат қилиш ҳуқуқини қўлга киритишди.