Ҳиндистоннинг Ассам штатидан тўрт миллионга яқин киши депортация қилиниши мумкин

Ҳиндистоннинг Ассам штатида агарда мамлакатда бўлиш ҳуқуқини тасдиқловчи ҳужжатларини кўрсатмаса, тўрт миллионга яқин киши депортация қилиниши мумкин, деб хабар берди NDTV телеканали.

Хабар қилинишича, янгиланган рўйхатга олиш маълумотлари миллионлаб кишиларнинг  штат ҳудудида бўлишлари қонунийлиги борасида саволлар келтириб чиқармоқда. Телеканалнинг эслатишича, қўшни Бангладешдан ноқонуний муҳожирлар оқими ошганлиги боис штатда 1951 йилдан буён илк бор қайд этиш рўйхати янгиланган.

Маҳаллий ҳукумат Ассам аҳолисини ваҳимага тушмасликка чақирди ва рўйхат дастлабки аниқлов эканлигини, ундан жой олмаганлар ҳозирча депортация қилинмаслигини билдирди.

"Айримлар атайлаб ваҳима уйғотишга уринмоқчи бўляпти. Бу дастлабки рўйхат, якуний эмас", — деди Ҳиндистон ички ишлар вазири Ражнатх Сингх.