Ҳиндистонда қийин аҳволга тушиб қолган ўзбекистонлик аёл ватанга қайтарилди

Ҳиндистон ҳудудида ҳаётий мураккаб вазиятга тушиб қолган Ўзбекистон фуқароси элчихона кўмагида юртга қайтарилди.

Фото: Getty Imagеs

Маълум қилинишича, аёл ҳужжатларини йўқотиши ва иш берувчиларнинг виждонсиз хатти-ҳаракатлари оқибатида ноқонуний эксплуатация хавфига дуч келиб, дипломатик ваколатхонага мурожаат қилган.

Консуллик бўлими томонидан зудлик билан маҳаллий ҳуқуқ-тартибот идоралари ва миграция хизматлари билан алоқа ўрнатилиб, фуқаронинг ҳуқуқий мақомини тиклаш чоралари кўрилди. Шунингдек, чиқиш ҳужжатлари расмийлаштирилиб, унинг хавфсиз қайтиши учун зарур ташкилий ишлар амалга оширилди.

Кўрилган чора-тадбирлар натижасида ватандош жорий йил 14 март куни Uzbekistan Airways авиакомпаниясининг HY424 рейси орқали Ўзбекистонга соғ-омон қайтди.

Ўзбекистоннинг Ҳиндистондаги элчихонаси фуқароларни чет элга чиқишда эҳтиёткор бўлишга, шубҳали иш таклифларига ишонмасликка ва хорижий давлатларда бўлиш қоидаларига қатъий риоя қилишга чақирди.